Det Grønlandske Selskab ataatsimeersuarpoq
Danmarkimi peqatigiiffik danskit nunatsinnik ilisimasaqarnerulernissaanik suliniuteqartoq ”Det Grønlandske Selskab” soqutigineqarnerulaarsimavoq, ilaasortat 1080-iusut siorna 16-inik ilasimammata.
Peqatigiiffik ippassaq ataatsimeersuarpoq, ataatsimeersuarnermilu peqataasut 70-it missaanniittut amerlanersaat 60-it sinnerlugit ukioqarmata, peqatigiiffiup inuusunnerusunik ilaasortaqalernissaa siunertaralugu suliniartoqarnissaa aalajangiunneqarpoq.
Peqatigiiffik kalaallisut qallunaatullu atuarneqarsinnaasumik maajimi internettikkut nittartagartaassaaq, tassuunakkut ilinniartut kalaallit qallunaallu soqutiginnilersinniarneqassallutik.
Det Grønlandske Selskabi peqatigiiffiuvoq politikkimut attuumassuteqanngitsoq, atuagassiamik ”Grønland”-mik saqqummersitsisartoq.
Inunnik nunarput pillugu immikkut ilisimasalinnik ilaasortassarsiornikkut oqalugiartitsisarnissakkullu peqatigiiffiup isertitassai amerlisinniarneqarsinnaasut, Martin Appelt siulersuisuni ilaasortaq oqarpoq.
