Savalimmiuni aalisarnermit isertitaasut isumaqatigiinngissutaapput
- Aalisarnermit isertitaasartut Savalimmiuni inuiaqatigiinnit iluaqutaanissaat partiitta siunertaraa. Inuiaqatigiillu aalajangertassavaat, kikkut aalisarsinnaassasut, suullu inuinnarnut tuniniarneqartassanersut. Inuit ataasiakkaaginnaat tamanna iluaqutigissanngilaat tassami aningaasat inuiaqatigiinnit tamanit pigineqassapput iluaqutaallutillu.
Savalimmiuni Socilademokraatit sinnerlugit qinigassanngortittoq, Sjurdur Skaale oqarpoq.
Taanna isumaqarpoq, aalisarnermit aningaasat milliardilikkaat isaatinneqartut inuiaqatigiinnit iluaqutaaneri annikippallaartoq.
Aalisarnermit isertitat inuiaqatigiinni iluaqutigineqassapput
Tamassumalu allanngortinneqarnissaa sulissutigalugu KNR-imut oqarluni.
- Inunnut ataasiakkaanut suliffeqarfissuarnullu ataasiakkaanut aalisarsinnaanermik uppernarsaatit akeqanngitsumik tuniniarneqartarneri ukiuni kingullerni takujuarparput ilaatigut nunani allamiunut soorlu Spaniamiunut Hollandimiunullu. Taamaaliornermi aningaasat inuiaqatigiinni kaaviiaartinneqartussaagaluartut pinngitsoortinneqartarlutik, Sjurdur Skaale oqarpoq.
Kaj Leo Johannsen oqarpoq aningaasat inuiatigiit iluaqutigaat
Savalimmiunili maanna Naalakkersuisuusut siulittaasuat, Kaj Leo Johannesen, Sambandspartiimeersoq allatut isumaqarpoq oqarluni aningaasat aalisarnermit isaatinneqartut inuiaqatigiinnit iluaqutigineqartut.
- Aalisarnermit aningaasat isaatinneqartut eqqarsaatigalugit maanna inissisimanerput pitsaalluinnartuuvoq, isertuutissanngilarali pitsanngorsaataasinnaasunik aaqqitassaqarmat.
Kaj Leo Johannesen oqarpoq eqqaamaqqullugulu 2008-miit Naalakkersuisuunerminni Savalimmiuni aningaasarsiorneq ilorraap tungaanut aallartissimagamikku soorluttaaq suliffissaaleqineq 8 procentimiit 3 procentimut appartissimagamikku.
Taama oqareerluni aningaasat milliardilikkaat inuiaqatigiinnit iluaqutaannginnerinik, Socialdemokraatit isornartorsiuinerannut akissuteqarluni ima oqarpoq.
- Inatsisartuni illuatungiluttuunertik pissutigalugu taama isornartorsiuteqarput allamik naamik, Kaj Leo Johannesen oqarpoq.
Illuatungiulittunit Socialdemokraatinit Savalimmiuni aningaasarsiornerup ukiuni kingullerni pitsanngorialaarsimanera iluarineqaraluartoq, taamaattoq aalisarnermit isertitaasartut inuiaqatigiinnit pitsaanerusumik iluaqutaannginneri taaqqinneqarpoq.
- Aningaasarsiorneq ilorraap tungaanut aallarsimagaluarpoq ajoqutaali ataasiinnaavoq, tassalu aningaasarpassuit inuiaqatigiinnit iluaqutigineqannginneri. Aningaasat suliffeqarfinnut ataasiakkaanit iluaqutigineqarput Savalimmiormiunit iluaqutigineqaratik
Savalimmiuni Socilademokraatit sinnerlugit qinigassanngortittoq, Sjurdur Skaale oqarpoq. Taanna Danmarkimi Folketingimut maanna aamma ilaasortaavoq