Pikialasorsuarmi killilersuisoqartariaqarpoq aqutsiveqarlunilu
![](/sites/default/files/styles/image_934x467/public/article_images/img_2967_2.jpg?itok=lqlnPboV)
Suliniaqatigiiffik piniartumit aamma professorimit taperserneqarpoq, taakkuami isumaqarput Pikialasorsuarmi piniakkat killilersorlugit aqutsiveqalernissaannut suliniuteqartoqartariaqartoq.
Suliniaqatigiiffimmi WWF-imi siunnersortip Mette Frostip oqarnera naapertorlugu piniakkat Pikialasorsuarmiittut tamarmik killilersorneqarnissaat pisariaqarpoq.
Piniakkat killilersorneqarlutik aqutsiveqartut tassaapput qilalukkat qaqortat qernertallu, aarrit nannullu, kisianni piniakkat tamarmik killilersorneqarlutik aqutsiveqarnissaat pisariaqartoq Mette Frost oqarpoq.
Pikialasorsuaq ulorianatorsiortinneqarsinnaavoq, silap pisussaata allangorneratigut, umiarsuarnik angallavigineqarneratigut aamma takornariaqarnermi. Siunissamimi aamma uumasunik najorneqartussaavoq Mette Frost oqarpoq
- Inuussutissaqartoqartariaqarpoq, piniarnikkut annikitsumillu aalisarnikkut inuuniuteqartoqarpoq.
- Maanili inuit siunissaqarnersut isigineqartariaqarpoq. aamma kinguaariit tulliuttut eqqarsaatigineqartariaqarput - sunami tamaat eqqarsaatigineqartariaqarpoq, Mette Frost oqarpoq.
![](/sites/default/files/styles/image_934x467/public/img_2945_2.jpg?itok=cChwndxc)
Pinngortitaleriffimmi professori Mads Peter Heide-Jørgensen
- Piniagassat siunissami piniarneqartussat aamma eqqasaatigalugit Pikialasorsuarmi piniakkat killilersorlugit aqunneqartariaqartut Pinngortitaleriffimmi proffesori Mads Peter Heide-Jørgensen oqarpoq.
- Uumasut Pikialasorsuarmiittut ulorianartorsiortinneqanngillat, kisianni amerlavallaanik pisaqartoqartarpat piniagassat ulorinartorsiortinneqartarput. Taamaalliluttillu piniagassat taama amerlatigisut ukiut qulit qaangiuppata piniarneqarsinnaassanngillat, Mads Peter Heide-Jørgensen oqarpoq.
- Ukiut qulit qaangiuppata piniagassaqarnissaa qulakkeerneqassappat ullumikkut pisarineqartartut ikilisinneqartariaqarput. Aarrit pisarineqartartut ikilisinneqarnerisigut taakkua amerlanerusut siunissami pisarineqartalernissaat naatsorsuutigineqarsinaavoq Pinngortitaleriffimmi professori Mads Peder Heide-Jørgensen oqarpoq.
Pinartoq Rasmus Avike siunissami piniarneqarsinnaasut eqqarsaatigai.
- Piniartunut unammilernartoqarpoq pissutigalugu inatsisit taakkuujuaannarmata avanersuarmi silap pissusaanut allanngoriartorneranullu naleqqutinngitsut, Rasmus Avike oqarpoq.
![](/sites/default/files/styles/image_934x467/public/article_images/img_2950_0.jpg?itok=G76nAu3B)
Pikialasorsuaq pillugu WWF Katuami saqqummiussimmat tusarnaariat 150-it missaanniittut takkupput