Demokratit ajugaapput

Hollandimi qinersisoqarnerani ministeriunerup Jan Peter Balkenendesip partiia, Demokratit, Socialdemokratinut ajugaapput. Taamaalilluni ministeriunerup partiia Hollandimi partiini annersaaginnassaaq.

- Hollandimi inatsisartuni ilaasortassanik qinersinerup aqaguani siallerpoq. Talerperliit partianni siuttup, Geert Wildersip, oqarnera naapertorlugu, Hollandimut nunasiniartut siuttut maannangaaq iliuuseqarfiginngippatigik muuamaamik upperisallit amerlipiloornissaat ilimagineqartariaqarpoq. Nunanit arabiamioqarfiusunit nunasiniartut tamarluinnarmik unitsinneqarnissaat taassuma kissaatigaa. Taama oqarnera Hollandimi innuttaasut tapersersorsimagamikku, inatsisartuni inissat 150-usut akornanni qulingiluanik, talerperliit ilaasortaatitaqalerput. Hollandimi naalakkersuinermik suliaqarsimasup, 2002-imi upernassakkut toqutaasup, Pim Fotuynip, Hollandimut nunasisarneq oqallisaasilerpaa. Pim Fotuyn nunani allani tusaamanerlunneqaraluartoq, Geert Wildersip nunasisut pillugit erseqqinnerusumik oqaaseqartarnera nunaqqataasa maqaasivaat.

- Uggornaqaaq taassumatut pikkoritsigisumik akornatsinniittoqanngimmat, qinersisartut ilaat oqarpoq.

Talerperliit ukiuni sisamani kingullerni naalakkersuisooqatigiinnerat naammagilersimallugulusooq Hollandimi innuttaasut saamerliit partiiat ippassaq qinersinermi taagorluarsimavaat. Taamaalillunilu sulisartut partiiat, socialistit partiiat, qinersinermi aamma ajugaarujussuarpoq.

- Ukiuni kingullerni politikki maanna atorunnartussanngormat nuannaarpunga. Saamerliit ukiuni tulliuttuni siuttuulernissaat nuannaarutigaara, qinersisartoq oqarpoq.

Hollandimi saamerliit siuttunngoraluarlutik novembarip qaammataani sialuk unitsissinnaannginnamikku akueriinnartariaqarpaat, Katrine S. Poulsen naggasiivoq.