Demokratit ajugaalluavipput
USA-mi ippassaq qinersinermi Demokratit ajugaalluaqaat.
Suli kisitsisoqaraluarpoq, Demokratilli nuannattunnguupput. Innuttaasut sinnerlugit sinniisoqarfimmi, tassa Repræsentanternes Husimi, inatsisartut ataatsimiittartoqatigiivini Demokratit ajugaapput, aamma inatsisartunut, tassa Senatemut, ajugaanissaat ilippanaateqarsinnaavoq.
Demokratit Naalagaaffimmi Missourimi ungasinngitsukkut aamma ajugaapput, naalagaaffiillu marluk kisitsivigineqarnissaat kisimi amigaataalerpoq. Naalagaaffiit taakku tassaapput Montana, Demokratit tamaani ajugaanissaat aamma qularnanngilaq. Montanap saniatigut naalagaaffik Virginia, Senatimilu amerlanerussuteqalissagunik naalagaaffimmi tassani aamma ajugaasariaqarput. Taasinernik 8.000-iunngitsunilluunniit Virginiami amerlanerussuteqarput, tamannalu tupaallannartutut nalilerneqarpoq, Virginiami ileqquusumik tassaammat naalagaaffik qanganisalerisoq, tassa konservativiusoq. Unammisut ima imminnut qanitsigaat, taasinernik immaqa kisitseqqittoqartariaqassalluni.
Guvernørinik qinersinermi Demokratit aamma siuariaqaat. Guvernørit inissaat nutaat arfinillit taakku pissarsiaraat, taamaalillutik USA-mi naalagaaffinni 50-ni amerlanerussuteqalerlutik.
Demokratit partiiat ilumut ajugaasuusoq, Præsidentip Illorsuanit ullaaq nassuerutigineqarpoq.
Qinersinermi præsident George W. Bush tassa ajorsarujussuarpoq. Præsident Bush Irakimilu sorsunneq iluarineqanngeqisoq qineqqusaarnermi Demokratit atorluaqaat, oqarsinnaalluta tamanna pillugu inuit taasisinneqartut.
Nutaarsiassaqartitsivik Reuters naapertorlugu qinersinermi inernerit Buship nakeriallaatigeqai, tusagassiortunillu unnugu katersortitsiniarluni nalunaarsimavoq.
