Demokraatit: Taasisitsinissaq kinguartilli

Kinguartitsiniarneq Inatsisartut ukiaanerani ataatsimiinneranni Demokraatit siunnersuutissaannut ilaavoq.

-Namminersornissap eqqunneqarnissaa sukumiisumik, ilumoortumik ammasumillu innuttaasut oqallisigisariaqarpaat, innuttaasummi angissanerlutik naaggaassanerlutilluunniit aalajangertussaavaat. Oqallinneq taanna juulimi aatsaat aallartinneqarpoq, Namminersorneq pillugu Isumalioqatigiissitap isumaliutissiissutaa illukkuutaarilluni agguaanneqarmat. Isumaqarpugut innuttaasunik taasisitsinissaq siusippallaartoq, Demokraatit siunnersuumminni allapput.

Partii aamma isumaqarpoq namminersorneq pillugu isumaqatigiissutip maannakkutut isikkuata Kalaallit Nunaata namminiilivinnissaanut piffissaq kinguarsassagaa. Taamaamamt Kalaallit Nunaata Danmarkillu akornanni aningaasatigut nutaamik isumaqatigiinniartoqarnissaa Demokraatit angorusuppaat.