Demokraatit Siumut teknikkikkut suleqatiginissaanik isumaqatigiissuteqarfigaat

Partiip naalakkersuisooqataasimasup Demokraatit, upernaaq qinersisoqarnerata kingorna ataatsimiititaliani ilaasortaaffigisai ikitsuinnaasimapput. Tamanna maanna allanngortinneqalerpoq, Demokraatimmi Siumut teknikkikkut suleqatiginissaanik isumaqatigiissuteqarfigaa. Tamannalu Demokraatit Inatsisartuni ilaasortaartitaata marluusut ataatsimiititaliani arlalinni ilaasortaalernissaannik kinguneqassaaq.
Allattoq Peter Troelsen
novembarip 05-at 2013 09:58

Jens B. Frederiksenip Anda Uldumillu Inatsisartut ataatsimiititaliaanni ilaasortaaffiit amerlanerusut akunnerminni agguartussanngorpaat. Tassalu inuussutissarsiorneq pillugu ataatsimiititaliami, ilaqutariinnut peqqinnissamullu ataatsimiititaliami kiisalu sanaartornermut ataatsimiititaliami ilaasortaaffiit.

- Demokraatini piffissami sivisuumi nunami maani  isumaqatigiiaarluni aggulussimaneq qatsuteqqasimavarput. Kissaatigaarput ungatitsinnut takutissallugu, Kalaallit Nunaat nunaasoq politikkikkut allanngujaassusilik kiisalu aamma politikki allanngornavianngitsoq allat pissaanermik tigusinerat pissutigiinnarlugu. Aalajangiinissanut pingaarutilinnut takkuttussanut sunniuteqarusuppugut aamma isumaqarpugut sunniuteqarnissamut aqqutissaq pitsaanerpaaq tassaasoq suleqatigiinneq aamma ataatsimiititaliani pingaarutilinnik suliaqarnermi, Jens B. Frederiksen oqarpoq.
 

Demokraatit naalakkersuisooqatigiinnut Partii Inuinullu isuumaqatigiissuteqarnerisigut IA-mut isumaqatigiissut atorunnaarpoq, Demokraatillu taamaasillutik kukkunersiuinermut ataatsimiititaliami inatsisinullu ataatsimiititaliami ilaasortaaffiit annaallugit. Demokraatit aamma neriuutigaat aatsitassat pillugit ataatsimiititaliami ilaasortaaffimmik pissarsisinnaassallutik.