Demokraatit Siumukkullu oqaatsit oqqassutigaat
Siumumiit oqarput Demokratit misigissutsinik tunngavinnigippallaaraat, illuanik Demokraatit oqartut, Siumup pissutsit aallaviginngippallaaraat.
- Politikeriusugut uagut innuttaasut qanoq atugaqarnissaat pillugu misigissuserput soorunami aallaavigalugu sulissaagut. Illua tungililiuttut partiata Siumup politikkikkut oqaaseqartartua, Karl Lyberth taama oqarpoq.
Taamannak oqarpoq, Demokratit politikikkut oqaaseqartartuata, Niels Thomsen, ammaanermi oqallinnermut atatillugu partiimi nunaqarfinnut politikia saqqummiummagu, oqarluni Demokratit amminut tapiissuteqarnissamiit
ilinniartunut inissialiornermut aningaasaleerusunnerusut aammalu Arctic Umiaq line-mut aningaasaliinissamiit Meeqqat Atuarfiat pingaartinnerutikkitik.
Niels Thomsen taamannak pingaarnersiuimmat, Karl Lyberth isumaqarpoq, Demokratit misigissutsitik ilaatinngikkaat, illuanillu kisitsisit pingaartippallaaraat.
- Kisitsisit kisiviisa aallaavigalugit politikeqarnerat tassani erserami. Tassa taanna annilaarnartua. Atorfilittat kisitsisit aallaavigalugit sulisarput, Karl Lyberth oqarpoq.
Kisianni Niels Thomsen erseqqissarpaa, namminneq misigissutsit puigunnginnamikkit. Kisiannili:
- Ullumikkorniit allaanerusumik pitsaanerusumillu ineriartortitsissagutta, kisitsisit aallaavigisariaqarpagut. Kisianni kisitsisinik kusassaaneq imminermini siunnerfigineqarsinnaanngilaq, Niels Thomsen oqarpoq.
Taanna isumaqarpoq, partiit naammassissaqarsinnaassusermik takutitsisariaqalertut. Taamaammat alajangigassat pingaartut misigissutisinik allaaveqaratik kisitsisinik tunngaveqartariaqartut isumaqarpoq.
- Sulinitsinni ilisimasat eqqorluinnaqqinnaartut aallaviginiarsarisarpagut. Uagut siunnerfeqartumik politikikkut ingerlatsiniarsarisarpugut, unammilligassagut suunersut isiniarsarisarlugit, qanorlu unammissanerlugit eqqarsaatigisarlugit.
