Demokraatit siulittaasussaminnik taasisinneqartussanngorput

- Mumisitsiniarneq annertoorujussuarmik qisuariartitsivoq, immikkoortortaqarfinnit, inunnit ataasiakkaanit, politikkikkut suleqatinit, parteeqatinit illuatungerisaniillu, tamakkulu uannut nukissarpassuarnik nutaanik tunniussipput, soorluli aamma taamatut tatigineqarnerujussuaq misigitinneqartoq Siumumit anisitaanerma kingorna Demokraatit pilersinneranik kinguneqartumik sulininni, Per Berthelsen allappoq.

Demokraatini aallartitsisup aarleqqutigaa, peersitaassaguni Demokraatit piuneerunneqarnissaat, taamaattumik siulittaasussamik taasisitsinissamut ilaserinnippoq.

- Unammillerumasut nalunaaginnassapput sisamanngorpat maajip aallaqqaataani nal. 12.00-inngortinnagu. Taava peqatigiilluta taasisitsinissap ilusissaa ingerlanissaalu suleqatigiilluta aaqqissuutissavarput, Per Berthelsen allappoq.

Demokraatini Per Berthelsen kommunimut qinersinermi kingullermi 926-inik taaguunneqarpoq, siulittaasunngorniarlu Jens B. Frederiksen 185-inik taaguunneqarluni.

Jens B. Frederiksen tallimanngormat oqarpoq, Demokraatit siulittaasoqarfiat immikkut ittumik siulittaasussarsiornissaq siunertaralugu juulip ulluisa arfineq-pingajuanni ataatsimeersuarnissamut aggersaallutik.