Demokraatit: Sinneqartoorutit internet-imut akikillisaanermut atorsigik

TELE Greenlandip kusanaqisumik sinneqartoorneranut atatillugu Inatsisartunut ilaasortat, Jens B. Frederiksen aamma Palle Christiansen, sukkasuumik qisuariarput, tassa ullumikkut pilluaqqusigamik, ilutigaluguli siunnersuutigaat sinneqartoorutit ilaat internet-imik atuinermut akiliutaasartunik allanngortitsinermut atorneqarsinnaannginnersut.

- Internet-imik atuinermut, volumentakstimut, tassa qanoq atuitigineq tunngavigalugu akiliutaasartumut, qaammammut aalajangersimasumik akiliuteqartoqartaleraluarpat, apeqqutaatinnagu qanoq annertutigisumik aallertoqartarnersoq, tamanna inuutissarsiornermi angerlarsimaffinnilu internet-ip periarfissarititai annertunerusumik atorluarsinnaalissagaluarput, akiliutissat annertuallaannginnissaat eqqarsaatigeqqaarnagu, Demokraatineersut, Jens B. Frederiksen Palle Christiansenilu, tusagassiutinut allapput.

Taakku isumaqarput sinneqartoorujussuarneq isiginiassagaanni TELE Greenland A/S-ip piffissami sivisuumi sullissinerminut akiliutit annertuallaartut atorsimagai, tamannalu eqqarsaatigisariaqalinnginnersoq. Taamatut annertuallaartumik akiliuteqartitsineq tassaasinnaavoq internet-imik atuinermut, oqarasuaatinut angallattakkanut, oqarasuaammut nalinginnaasumut atuinernut akiliisarneq.

- Internet-imik oqarasuaammillu atuinernut akiliutit minnerugaluarpata, tamakku tungaasigut ineriartortitsineq qularutissaanngitsumik pilissagaluarpoq, kiisalu inuutissarsiornikkut inerisaanermik unammilleqatigiinnermillu pitsaanerusumik kinguneqarsinnaalluni, Jens B. Frederiksen Palle Christiansenilu, Demokraatineersut, tikkuaapput.