Demokraatit sakkortuuliorput

Aningaasanut inatsisissap eqqartorneqarnerata nalaani nutaarsiassat kingulliit ima tusarliunneqarput.

Inatsisartuni ullumi ataatsimiinnerup naggataarutaasumik ingerlanneqarnera pissanganalaavippoq. Aningaasanik inatsisip 2005-imoortup akuersissutigineqarnissaa eqqartorneqarmat oqallinneq sakkortungaatsiarpoq, uparuaanerit arlaqarput, soorlu SIK pissarinngisaanik aningaasaliiffigineqarfigineqarsimanerarlugu Demokraatit akuersiumanatik aamma oqaaseqarput, ataatsiminneq ammarneqarmat oqaatsit sakkortuut Demokraatiniit aninneqartarput, naalakkersuisullu marluk, Doris Jakobsen aamma Asii Chemnitz Narup, tunuarmata, Demokraatineersoq Palle Christiansen oqarpoq, naalakkersuisunik taarsiineq puiorsaatitut atorneqartoq. Palle Christiansen sakkortuumik oqarpoq, Hans Enoksen tassaasoq ajoqutaasoq, tunuartariaqartorlu. Hans Enoksen Aalisarnermut Naalakkersuisuugallarnermini aalisarnermut tunngassuteqartunik immikkut akuersissuteqarsimanera eqqunngitsuliornertut nalilerlugu Demokraatit oqarput, Hans Enoksenimik tatiginnikkunnaarnermik taasinissaq aamma piumasarineqaraluarluni, tamannali aamma pinngitsoortinneqarpoq.

Demokraatineersoq Palle Christiansen kamaammersimaqaluni nerrivik ilaatigut tilluppaa, aamma ataatsimiittarfiup silataani Hans Enoksen naapikkamiuk ima allaat appiullugu:- Pilluarit, nunatsinni siullersaallutit diktatorinngoravit.

Per Berthelsen aamma oqarpoq, nunatsinni bananrepublikkeqalersugut.