Demokraatit qilalukkat qernertat pillugit siunnersuumminnut itigarput

- Oqarsinnaasariaqarpugut piniartoq tassaasoq piniarnermik inuussutissarsiutilik. Aamma pisassiissutigineqartussat amerlanngillat, kikkunnullu tamanut pisasiissutigineqassappata, piffissap sivikitsup ingerlanerani tamakkerneqarataannaapput, IA-p piniarneq pillugu oqaaseqartartua, Hans Aronsen, oqarpoq.

Demokraatit siunnersuutaat Siumumit aamma tunuarsimaarfigineqarpoq.

- Allatut ajornaqaaq, kuturitoqaagaluarpalluunniit, killilersuineq taama sakkortutigitillugu, piniarnermik inuussutissarsiutillit salliutinneqartariaqarput, taakku ikittuaraammata. Amerlagaluarpata, allat qanorsuaq aamma pisaqarsinnaanissaat inassutigissagaluarparput, Siumumeersoq Finn Karlsen oqarpoq.

Kitaani Kujataanilu qilalugarniarneq pingaaruteqarpallaassanngitsoq, Piniarnermut naalakkersuisoq Ane Hansen naliliivoq. 2006-mi 2007-milu Kujataani qernertanik tallimanik qilaluartassiisoqarmat, tamakkerlugit pisarineqanngitsut, Ane Hansen oqaluttuarpoq. Ataaserli qularutissaanngilaq:

- Pisassaareersut iluanni taakkua tiguneqarnissaat naatsorsuutigineqassammat, Ane Hansen oqarpoq, nangilluni oqarluni, Demokraatit isumaqatiginagit oqarmata, qilaluarniarneq kulturitsinnut ilaammat, pisassiissutissat tamanut tuttariaqartut:

- Naalakkersuisutut uanga sulininni pingaartittuagara, piniarnermik inuussutissarsiuteqartut salliutinneqarnissaat. Aamma taanna qimannaviangilara, taakkua inuussutissarsiutigimmassuk, Piniarnermut naalakkersuisoq, Ane Hansen, oqarpoq.