Demokraatit: Politikkikkut aalajaatsuunissaq pingaaruteqarpoq
- Massakkut taama aalajangiisoqarsimanera ataqqivarput, taava siunissaq eqqarsaatigalugu Demokraatit suleqataajumaarput. Qulakkeertussaagatsigu massakkut inatsiserpassuit allanngortinnissaat, aamma nunat tamalaat akornanni isumaqatigiissutinut ilaanissarput. Taassuma saniatigut aamma qulakkeertussaavarput isumannanngitsumik avatangiisinut taavalu aamma peqqissutsimut pitsaasumik piiaasoqarnissaa, Demokraatit siulittaasuat Jens B. Frederiksen oqarpoq.
Aatsitassarsiorsinnaanermut atatillugu politikkikkut aalajaatsuunissaq pingaaruteqartoq, taassuma oqaatigaa, inatsisit malittarisassallu ukiualunnguit ingerlaneranni allanngorteqattaarnissaat orniginartinnagu, avataanit isiginiarneqarnitta taamaaliornikkut innarlerneqarsinnaanissaa aarleqqutigalugu. Inuit Ataqatigiinnullu taanna ima kaammattuuteqarpoq:
- Inuit Ataqatigiit kajumissaaginnassavakka suleqatigaluta massakkut qulakkiissallugu isumannanngitsumik piiaasoqalersinnaanissaa, Demokraatit siulittaasuat Jens B. Frederiksen oqarpoq.
