Demokraatit: Pipallanneq aqqutissaanngilaq
Qaanaami imigassamik killilersuineq aqqutissaanngilaq, taama Demokraatit isumaqarput. Partiip nuna tamakkerlugu imigassamut politikkeqalernissaq salliutillugu anguniaqquaa, taamaaliornikkut innuttaasut imigassamik atuinerput aatsaat allanngoriartulersinnaammat.
Demokraatit ilaqutariinnermut tunngasuni avammut oqaaseqartartua Astrid Fleischer Rex oqarpoq, pinasuartumik periuseqarluni, soorlu imigassamik matuseriataarneq, aqqutissaanngitsoq.
- Demokraatinit Naalakkersuisut sakkortuumik kaammattorusuppavut suliniutinik annertunerusunik aallartitseqqullugit, taamaaliornikkut Qaanaaq aammalumi Kalaallit Nunaata sinnera ikiorsiivigineqarniassammat, oqarpoq.
Qaanaami meeqqat inuusuttuaqqallu ornittagaat pioreersut annertusarneqartariaqarsorai, angerlarsimaffinni toqqissisimasumik angerlarsimasinnaatinnagut ornittagassaannik isersimaffigisagassaanillu pilersitsinikkut.
Innuttaasut ataatsimiisinneqartariaqarsoraat, soorluttaaq Qaanaap kommunalbestyrelseata, inunnik isumaginninnermut tunngatillugu aningaasaliinerunissaa isumagisariaqarsoralugu.
Naalakkersuisut siunissaq ungasinnerusoq eqqarsaatigalugu tamakkiisumik aaqqiissutissanik suliaqartariaqarput, pinasuartumik pigatik, Astrid Fleischer Rex, Demokraatinit kaammattuivoq.
