Demokraatit nutaamik atuakkiorput atsersimasaminnik "Naamik"

Namminersornerullutik Oqartussat angertitsiniutaat illuatungilertariaqarmata atuakkamik naaggaartitsiummik Demokraatit ullaap tungaagut saqqummersitsipput. Imalu Demokraatit siulittaasuat Jens B. Frederiksen tunngavilersuivoq.

- Angerutta Namminersornerullutik Oqartussaaneq uterfigeqqissinnaanngilarput, kisiannili naameerutta allamik isumaqatigiissummik tunngaveqarluni Namminersornermut ikaarsaariarnissatsinnut periarfissaqalissaagut, siulittaasoq oqarpoq, Namminersorneq pillugu isumaqatigiissut sorpassuartigut amigaateqarneraatigalugu.

- Inissiat atuarfeqarfiillu aserfallannikut suliarinissaanut 3,8 milliardi koruunit amigaatigaagut. Peqqinnissaqarfik ajortumik ingerlavoq. Kinguaassiuutitigut atornerluinerpassuupput. Meerarpassuit kaallutik unnukkut innartarput aqaguanilu kaallutik atuariartortarput atuarfimmilu nerisassaqartaratik. Tamakku tamarmik aaqqiivigeqqaartariaqarput aningasassaqartinneqartariaqarlutillu, Jens B. Frederiksen oqarpoq.

Demokraatit aarleqqutigaat inissiat qassiit ukiut qulit qaangiuppata atorsinnaajunnaarsimanissaat. Taamaammat Kalaallit Nunaat Danmarkip naalagaaffianit aningaasanik amerlanernik pisariaqarsoraa.

- Susassaqarfiit nutaat aningaasanik malitseqartariaqarput. Aamma aatsitassarsiorfinninngaanniit 75 millioni koruuniinnaanngitsut nunatsinnut tuttariaqarput, minnerpaamik 1 milliardi koruuniusariaqarput, taava aningaasartuutissatsinnut akissaqalissaagut, erseqqissaavoq.

Demokraatit Namminersornerup qaquguugaluarnersoq siunissami eqqunneqarnissaa akueraat, kisianni isumaqatigiissut naaggaarlugu.

-Isumaqatigiissut-una ajorpallaartoq. Kalaallit Nunaannut iluaqutaavallaanngilaq, Qallunaat Nunaannut iluaqutaaneruvoq, Demokraatit siulittaasuat naggasiivoq.

Atuagaq katillugit 80-inik qupperneqartoq Naamik / Nej 7.000-inngorlugu naqinneqarpoq. Taanna illoqarfinni annerni pissarsiarineqarsinnaavoq, Demokraatillu nittartagaanni Demokrat.gl-imi aaneqarsinnaalluni.