Demokraatit Naalakkersuisunut: Puigugaqanngilasi?
Kiisami. Saammaasseqatigiinnissamut isumalioqatigiissitat, maanna Naalakkersuisuusut, naalakkersuisoqatigiinnissamik isumaqatigiissutertik saqqummiukkamikku pilersissallugit neriorsuutaata, ilaasortaasa aqqit ippassaq kiisami saqqummiunneqarput.
Isumalioqatigiissitat tamatigoortumik ilinniakkatigut assigiinngitsunik inuiaqatigiinnullu tunngassuteqartunut piginnaasaqartuunissaat Naalakkersuisut pingaartissimagaat, taakkua siulittaasuat allappoq.
Arnat sisamat angutillu marluk
Kisianni sivitsungaanngitsoq isorinnittoqalereerpoq. Demokratit siulitaasuat taama maluginiagaqarpoq, paragraf 37-ilu atorlugu Naalakkersuisumut apeqquteqarniarluni.
AAMMA ATUARUK Saammasseqatigiinnissamut isumalioqatigiissitamut ilaasortanngunngitsoortut aamma peqataatinneqassapput
- Naligiinnerunissamut oqariartuutigineqartut inatsisiliarineqarnikuusorlu uniorlugu ilaasortat sisamat arnaapput angutillu marluk, naak oqariartuutigisaraluarlugu, affai angutaassasut affaalu arnaassasut, Anda Uldum oqarpoq.
Taannalu ilumoorpoq, tassami angutit arnallu naligiissitaanissaat pillugu inatsimmi 2013-imeersumi, Demokraatit kisimik pinnatik partiit sinnerisa akuersissutigisaanni, paragrafit arfernat ilaatigut ima nipeqarpoq.
"...suiaassutsit arlaat aapparminnit ilaasortamik ataasiinnarmik amerlanerussuteqassallutik".
- Taamaammat naligiissitaanermut naalakkersuisoq Nick Nielsen qanoq oqaaseqarfigissaneraa pissangagisupilussuuarput. Taanna qanoq isummerfiginiarneqarnersoq paragraf 37 naapertorlugu apeqqutigisussaavarput, Demokraatit siulittaasuat Anda Uldum taama oqarpoq.
AAMMA ATUARUK Saammateqatigiinissamut Isumalioqatigiissitaq piviusunnguleqaaq
