Demokraatit naalakkersuisunik isornartorsiuingaatsiarput

Naalakkersuisut siulittaasuata, Hans Enoksenip, inatsisartut ukiami ataatsimiinnissaata ammarneqarneranni oqalugiaataa ullumi oqallisigineqarpoq.

Politikkikkut anguniakkat tunuliaqutaralugit oqallittoqarpoq, Demokraatillu illuatungilliuttut oqalugiaammut oqaaseqaateqarnerminnut atatillugu naalakkersuisooqatigiit maannamut angusarisimasaat naliliiffigaat.

Siulittaasuat Per Berthelsen ima nassuiaavoq:

- Nunatsinni aqutsinermut atatillugu illuatungiliuttumik isorinnissinnaassuseqarluta isiginnittutuaalluta, pisussaaffittut isigaarput naalakkersuisooqatigiit ukioq ataasinngulillartorlu angusaat kingumut qivialaassallugit. Naalakkersuisut ataasiakkaanik akisussaaffeqarput, taamaattumillu ataatsimoortillugit eqqartoruminaallutik. Taamaattumik ataasiakkaat kingumut qiviarnikkut nalilerpavut, Per Berthelsen oqarpoq.

Naalakkersuisuni suliamik inorsartutut nalilerneqartuni, Kultureqarnermut, Ilinniartitaanermut, Ilisimatusarnermut, Ilageeqarnermullu naalakkersuisoq Doris Jakobsen sakkortunerpaamik isornartorsiorneqarpoq:

- Pingaartitarput tassaavoq naalakkersuisut kikkuuneri taagornagit, akisussaaffeqarfiilli nunatta ingerlanneqarnerani aalajangiilluinnartuusut ataasiakkaat nalilersussallugit, kisianni uani aqqa taanngikkaluarlugu oqaatigiinnassavara partiitta tungaaninngaanniit, pineqartoq, ujartuiffigisarsimagaluaratsigu annertoorujussuarnik saaffiginnissuteqarnikkut, maannamulli akissutit sullunangaartarmata karaketerimik pitsaanerusumik tunisinnaasimanngilarput, Demokraatit siulittaasuat Per Berthelsen oqarpoq.

Naalakkersuisut siulittaasuata Hans Enoksenip akissuteqaateqarnermini ilaatigut atermik taaguilluni isornartorsiuinerit pissusissamissunnginnerarpai.

Naalakkersuisooqatigiinnerup iluani kommunit kattussuunneqarnissaat pillugit isumaqatigiinngissuteqartoqartoq qalleqqissarneqarpoq.