Demokraatit: KNI-mut tunngasoq amigaatigaara

Naalakkersuisut Siulittaasuata ukiortaami oqalugiaataa Demokraatit siulittaasuata Per Berthelsenip iluarisimaarpaa, ukiulli naalernerani pisut, soorlu suliffeqarfissuarmut KNI-mut tunngasut, eqqaaneqannginnerat ippigaa. Per Berthelsen ima oqarpoq:

-Isumaqarpunga oqalugiaat taanna pissutsinik piviusumik aallaaveqarnerulluni massakkut ingerlanneqartoq. Amigaatigaarali tassaavoq, nassuerutitaqarmat, aamma politikkikkut eqqissiviilliuutit assigiinngitsut kingumut qivialaarneqannginnerat taanna ippigilaarpara, Per Berthelsen aallartippoq.

Demokraatit siulittaasuata tassani eqqarsaatigaa pisoq KNI-mut tunngasoq.

- KNI-mut atatillugu ajornartorsiornerujussuaq, sinerissami angallassinermut attuumassuteqartumik ajornartorsiuterujussuarnik pilersitsisoq eqqaaneqanngilaq. Isumaqarpunga inuiaqatigiit kalaallit annertuumik annikilliortitaallutillu eqqorneqartut. Immaqa utoqqatserpalaartumik oqariartorfigineqarlutik pineqarsinnaagaluarput, oqarpoq.

- Kisianni tamakkiisumik isigalugu, oqalugiaat una, Hr. Hans Enokseni nunatsinni naalakkersuisuni siulittaasunngormalli, oqalugiaatigisartagaani pitsaanerpaatut nalilerusuppara, Per Berthelsen naggasiivoq.