Demokraatit: Karlsen qanoq piniarpit?
Septembarip ulluisa arfernanni tusarliupparput puisit amiinik Canadameersunik Ruslandimeersunillu eqqussuinerup inerteqqutigineqalernissaanut EU-parlamentimi ilaasortat 732-iusut amerlanersaat isumaqataalersut. EU-mi puisit amiinut Canadameersunut akerliulluni upernaaq maajimili atsiortitseqattaarnerit aallartimmata, EU-mut paasisitsiniummik Naalakkersuisugut allagarput. Tamatuma kingorna Danmarkimi socialdemokratit EU-mi ilaasortaatitaat, amernillu Canadameersunik piseqqusiunnaarnissamut illersuinerpaanut ilaasoq Dan Jørgensen, puisit amii pillugit oqillinnermut akuliuppoq oqarluni taama piseqqusiunnaarnissamik siunnersuuteqarniarneq Kalaallit Nunaata nuaannaarutigiinnartariaqaraa, inerteqqutiginiarneqartoq Canadamiunnaq tunngammat. Piniarnermut naalakkersuisoq Finn Karlsen akilluni oqarpoq puisit amiinut canadameersunut akerliulluni atsiortitsinerit uppernassusiat apeqqusertariaqartoq paasitinneqarsimanertik tunngavigalugu tamanna fiisternerup nalaani pisimammat. Taama oqarneq Dan Jørgensenip salluliornerunerarpaa, atsiornernik katersinerit qaammaterpassuarni pisimammata. Finn Karlsenip Dan Jørgensenillu puisit amii pillugit aporaannerat, kulturit marluk aporaannerannik tunngaveqartinneqarpoq. Demokraatineersup Jens B. Frederiksenip paaserusuppaa Finn Karlsenip fiisternerup nalaani atsiortitsineraanini suli aalajangiusimaneraa, tassungalu atatillugu apeqqutigaa salluliorsimanermik pasillernini pillugu Dan Jørgensen, utoqqatseqquneqassanersoq. Dan Jørgensen naaggaassappat Finn Karlsenip atsiortitsinerit fiisternerup nalaani pisimanerarlugit oqaaseqarsimanini ilumuunnginnerarlugit nalunaaruteqarniarnersoq Jens B. Frederiksenip aamma paaserusuppaa.
Jens B. Frederiksenip apeqqutaanut tunngasumik Piniarnermut naalakkersuisoq Finn Karlsen ullumi oqaaseqartisinnaansimanngilarput. Finn Karlsen EU-parlamentimi ilaasortanut kommissærinullu allagaqareerpoq, EU-mullu aallartitaqarluni paasisitsiniaanissaq maanna nalilersorneqarpoq.
