Taamaalilluni IA-p maannamut ilaasortaatitaasa qulingiluaasut saniatigut tallimat ilaasortanngussagaluarput. Aviisimi allaaserinnittup ilimagaa, illuatungiuliuttut arlaat Demokraatit ullumikkut qinersineqartuuppat kinguariassagaluartut. Qinersisartunik isumasiuinermi paasinarsivoq, Siumumik Atassummillu taasisarsimagaluit maanna IA-mik qinersissasut. Qinersineqartuuppat Atassutip ilaasortaatitai marlunnik ilanngassagaluarput, Siumulli Demokraatinik taasisarsimagaluartunik iluaqutserlutik nikissanngikkaluarput.
Naalakkersuisut siulittaasuata Hans Enoksenip oqaatigaa aatsaat Siumut kinguariarnissamik ilimasaarneqalinngitsoq.
- Qinersilernerit tamaasa kinguariarnissarput siulittuutigineqartarpoq, qinersereernerilli kingorna siuarianngikkutta ilaasortavut taamaaginnartarput. Taamaammat Inatsisartunut qinersinissaq ersissutiginngilara, Hans Enoksen Sermitsiami issuarneqarpoq.
Demokraatilli siulittaasuat Jens B. Frederiksen naalakkersuisuutitaqalernissami suleqatigiinnissamut isumallualerpoq, IA-mut nuliarsarami.
- Anguniagaat uagutsinnit allaanerungaanngilaq, inuk qitiutillugu, sanngiinnerillu tapersersorlugit suliniartuugatta. Misissuinerup inernera eqqorpat, maannalu naalakkersuisoqatigiit kinguariarpata IA-lu suleqatigiissutissaqarluarpugut, Jens B. Frederiksen Sermitsiami issuarneqarpoq.