Demokraatit: Inatsisartut tukattunik suleriaaseqarput
Demokraatit siulittaasuat, Jens B. Frederiksen, isumaqarpoq, Naalakkersuisut aamma partiit naalakkersuisunut ilaasortaatitaqartut akunnerini suleqatigiissimaneq annikippallaartoq. Nukissiorfiit piginneqatigiittut aktieselskabitut aaqqissuunniarneqarnerat Jens B. Frederiksenip assersuutissaqqinnerarpaa, tikkuarlugulu Naalakkersuisut siunnersuutaat Inatsisartuni arlaleriarluni tunuartinneqartartoq, soorlu illuatungiliuttunit, Atassutikkunnit.
- Erseqqilluinnartumik takuneqarsinnaavoq siunnersuut - siunnersuuterpassuit allat assigalugit - partiinut attuumassuteqartunut saqqummiunneqarsimanngitsoq, tamatumalu kinguneraa suleqatigisat kinguartitsinerat. Tamannami pissutaalluni partiini naalakkersuisooqatigiinni eqqissiviilliortoqalerpoq, tamananlu Inatsisartut sukkasuumik kingunilimmillu sulisinnaanerannut sunniuteqarnerluppoq, Jens B. Frederiksen oqarpoq.
Demokraatit sulissutiginiarpaat Naalakkersuisut partiillu Naalakkersuisooqataasut akornanni ataatsimiititamik ataqatigiissaarisussamik pilersitsisoqarnissaa, apeqqutaatinnagu partiit sorliit juunip ulluisa aappaanni Naalakkersuisooqataatitaqalissanersut. Kukkunersiuinermi periutsinik nutaanik pilersitsinissaq Demokraatit sulissutiginiarpaat, tassa Nunani Avannarlerni nuna tamakkerlugu kukkunersiuinermi suliaqarnermi avataaniit taamatut suliaqartussamik pilersitsinikkut, periaaserlu taanna nunanit tamanit ataqqineqarpoq.
- Pitsanngorsaatit tamakkua pissutigalugit isumaqarpugut Inatsisartunut, taakkualu suleriaasiannut, siunissami ataqqinninnerulernissaq anguneqarsinnaasoq, Demokraatit siulittaasuat, Jens B. Frederiksen, oqarpoq.
