Demokraatit ilaasortaminik pingasunik peersitsivoq
Demokraatit Nuummi immikkoortortaat ippassaq ataatsimiippoq, tamatumalu kinguneraa ilaasortat pingasut anisitaasariaqalernerannik. Pineqartullu tassaapput, nuna tamakkerlugu demokraatini siulittaasussatut piukkussaq Jens B. Frederiksen kiisalu Karen M. Lynge aammalu Astrid Fleischer Rex.
Jens B. Frederiksenilli tamanna ileqimisaarutigiinnarpaa, taamatullu aalajangerneq atorsinnaanngitsutut nalilerlugu.
- Tamatta pingasuulluta siulersuisuunerni inissisimavugut, maleruagassat naapertorlugit taamatut anisitsisoqarsinnaavoq aatsaat nuna tamakkerlugu ataatsimeersuartoqartillugu ilaasortat pingajorarterutaasa tamanna aatsaat kissaatigisippassuk, Jens B. Frederiksen oqarpoq.
Nuummi demokraatit siulersuisui qanittukkut taarserput, siulittaasunngortorlu nutaaq tassaavoq Erik H.K. Heilmann. Taanna ilaasortaajunnaarsitsinissamut malittarisassatik pillugit ima oqaasertaliivoq:
”Ilaasortaajunnaarsitsisoqarsinnaavoq pineqartoq partiimut ajoqusiilluni iliuuseqarpat imaluunniit partiip anguniagaanut akerliuppat”.
Aaqqiagiinngissutinuttaaq ilaavoq ilaasortat tamarmik taasisinnaatitaanerannut tunngasoq. Nuummi demokraatit siulersuisuisa amerlanerussuteqarlutik kissaatigaat ilaasortat tamarmik taasisinnaasariaqarnerat. Tamannali Jens B. Frederiksenip aammalu Karen M. Lyngep kiisalu Astrid Fleischer Rex-ip akerlerigaat tusagassiutinut nalunaarummi allassimavoq.
Demokraatit nuna tamakkerlugu siulersuisuini ilaasortat amerlanerussuteqarlutik siulittaasussamik qinersinissaat aasaru juulip arfineq-pingajuanni pissasoq aalajangiuteqqammerpaat, erseqqissaatigineqarporlu tamatumani Jens B. Frederiksenimut illersuisut tassani pineqarnerat.
