Demokraatit ICC-mik uparuaanerat Atassutip taperserpaa
Niels Thomsen (D) ICC-mik uparuaavoq, oqarluni Inuit Issittormiut Siunnersuisoqatigiiffiat ICC nunatta karsianit aningaasanik amerlavallaanik taperneqartartoq, saniatigullu kattuffiup naatsorsuutaanik ujartuivoq. Ilumoorpoq, Steen Lynge, Atassutip politimut tunngasuni oqaaseqartartua oqarpoq.
ICC Nunatta Karsianit 2010-mi 5,4 mio. koruuninik taperneqarpoq. Taamaammat Niels Thomsenip ammasunik aviisinut allagaqarnermigut siunnersuisoqatigiit naatsorsuutaannik takorusussimagaluarpoq.
-ICC allaanngilaq imminuinnaq sullittoq, Nunatta Karsianit ukiut tamaasa millionerpassuarnik tunineqartaraluarluni matoqqasutut ittuuvoq, allaammi aningaasarpassuit pisani sumorpiaq atortarnerai nalunarpoq, Niels Thomsen ilaatigut oqarpoq.
ICC-p ukiumoortumik naatsorsuutaasa nittartagaanni takoriaannaannginnerat aamma demokratiimik innarliinerusoraa.
Uparuaaneralu Atassummi siulittaasup tulliata Steen Lyngep illersorpaa, oqarluni Nunatta Karsianit ukiumut ICC-p pisartagaanik ikinnerujussuarnik pisartut naatsorsuutinik tunniussisussaatitaanerminnik malinnittarpata, aamma ICC taamaaliortariaqartoq.
- Isumaqarpunga Niels Thomsen pissutissaqarluartumik uparuaasoq. ICC Namminersorlutik Oqartussanit ilumut taamarsuaq tunineqartuaannassanersoq apeqqusertariaqavippoq, Steen Lynge oqarpoq.
Aqqaluk Lyngep Niels Thomsenip uparuaanera Qanoruumi ataasinngormat akissuteqarfigaa.
- Niels Thomsen aningaasaqarnermut ataatsimiititaliami ilaasortaavoq, taakkulu ICC-ip naatsorsuutai tamaasa pisarpaat. Qaqugukkulluunniit aamma naatsorsuutivut piumallugit parteeqatiminut aningaasaqarnermut naalakkersuisumut Palle Christiansenimut saaffiginnissinnaavoq, Aqqaluk Lynge akivoq.
Steen Lyngep aamma uparuarpaa, ICC-mi nunatsinni partiit pingasuinnaat sinniisoqarnerat. Nunatsinni soqutigisaqatigiit tamarmik ICC-mi sinniisoqannginnerat.
Inuit Ataqatigiinneersooq Hjalmer Dahl, Demokraatineersoq Ib Uldum aamma Siumup siulittaasua Aleqa Hammond ICC-p ataatsimeersuarnerani taasisinnaatitaasut nunatsinnit peqataasunut ilaapput.
