Demokraatit Hans Enoksen tunuaqquaat

Inatsisartut kukkunersiuinermut ataatsimiititaliaata isumaliutissiissutaa inatsisartut pingasunngorpat ataatsimiinneranni sammineqassaaq.

Naalakkersuisullu siulittaasuata Hans Enoksenip tatiginninnginnermik taasisitsineq anigorsinnaassaneraa apeqqutaaginnalerpoq.

- Kukkunersiuinermik ataatsimiititaliap isumaliutissiissutaa sammineqannginnerata siornatigut Hans Enokseni tunuanngippat tatiginninnginnermik taasisitsiniarpugut, Demokraatit politikkikkut oqaaseqartartuat Palle Christiansen kalerrisaarivoq.

Aalisakkanik pisassiissutinut marlunnut tunngasunut Hans Enoksen eqqunngitsuliorsimanerarneqarpoq. Naalakkersuisut siulittaasuata aalisarnermut naalakkersuisuugallarmat tamanna pivoq.

Sulisitsisut Inuussutissarsiutitigut ilinniartitaanernut Tapiissutinik, AEB-nut tapiissutinik taaneqartartut, naalakkersuisut aqutsinerat inatsisartut kukkunersiuinermut ataatsimiititaliaata aamma isornartoqartippaa.

Inuussutissarsiutitigut ilinniarfiit pikkorissaanernik aqutsisimanngimmat aammalu pikkorissaanernit pisortatigoortumik tamanut ammasuusimanngimmata, AEB-mit tapiissutit atorneqarsimanerat Kukkunersiuinermut Ataatsimiititaliamit isornartorsiorneqarpoq.