Demokraatit: Finn Karlsen asuli oqaluppoq

Qeqertarsuup Tunuani saattuarniarnerup aallarteqqinneqarnissaanik Naalakkersuisut aalajangernerat Demokraatit akerleraat, Finn Karlsenip tunngavilersuutaa tupinnartutut asulilu oqalunnertut taallugu.

Aalisartut qaleralinnik saarullinnilluunniit aalisarnissaminnut periarfissaqannginnerat, taavani saattuarniarnerup aallarteqqinneqarneranut Finn Karlsenip tunngavilersuutigaa, tamannali Demokraatit isumaqatiginngilaat.

- Soorunami allatut iliorfissaqaraluarpoq. Naalakkersuisut, soorlu, assersuutigalugu aalajangiutartik siulleq aalajangiusimaannarsimasinnaagaluarpaat. Aalajangerneq taamaattoq nungukkiartuutaasimassanngikkaluarpoq, ungasinnerusorlu eqqarsaatigalugu kikkunnut tamanut nuannaarutaassagaluarluni, Demokraatit aalisarnermut oqaaseqartartuat, Jens B. Frederiksen, tusagassiuutinut allappoq.

Saattuarniarneq septembarip ulluisa 15-ta tungaanut uninngasussatut Naalakkersuisut aalajangiutereeraluaraat, Qeqertarsuup Tunuani ullualunnguit matuma siorna aallarteqqippoq.