Demokraatit: Enoksen akuliunniarsarivoq

Naalakkersuisut siulittaasuat Hans Enoksen februaarip 19-iani oqarpoq, Aasianni Royal Greenlandip suliffissua siornaak 2005-imi novembarimili matoqqasoq piumassusilinnut tunniunneqartariaqartoq. Naalakkersuisut siulittaasuat taamaaliornermigut Royal Greenlandip niuernikkut ingerlatsineranut akuliunniarnerarlugu Inatsisartuni ilaasortaq Demokraatineersoq, Inatsisartullu aalisarnermut piniarnermut nunalerinermullu ataatsimiititaliaanni ilaasortaq, Jens B. Frederiksen, uparuaavoq. Uparuaanini Jens B. Frederiksenip ima tunngavilersorpaa:

- Demokraatit isumaqarput piginneqatigiiffinnut aktieselskabinut akuliuteqattaassalluni pissusissamisuunngitsoq. Royal Greenlandip ataatsimeersuarnerani naalakkersuisut piginnittutut kissaateqarnissamut periarfissaqarsimapput.

Jens B. Frederiksenip erseqqissaatigaa Royal Greenlandip niuerpalaartumik, tassa sinneqartooruteqartussatut ingerlanneqalernissaanik Inatsisartut siornaalli aalajangertut.

- Taamaammat politikerit akuliuteqattaaginnarnissaat pissusissamisuunngilaq.

Jens B. Frederiksen aperaarput, pissusissamisuunnginnersoq Naalakkersuisut siulittaasuat nunami maani akisussaanerpaatut inissisimasoq pineqartumut tunngasunik isummersorsinnaassappat, akivorlu:

- Soorunami isummersorsinnaavoq, kisianni sulifissuup allanut tunniunneqarnissaanut naalakkiisutut nipilimmik oqaaseqarnera pissusissamisuunngilaq. Aamma suliffeqarfissuup piginneqatigiiffittuut nuiernerpalaartumik ingerlasup tatiginassusaa tassuuna apeqquserneqarsinnaavoq. Suliffissuaq tunniutiinnarneqassappat Royal Greenlandip niuersinnaassusaa aamma innarlerneqartussaavoq.