Demokraatit: CO2 pillugu anguniakkat annikippallaaqaat

- Tassa ukua saqqummiunneqartut uagut tapersersornartutut isigaagut, taava taamaallaat suli imaqarnerusinnaagaluartoq kissaatiginarpoq. CO2-mik aniatitsinerup millisarnissaa Namminersornerullutik Oqartussanit millisaaniarnissamut iliuusissamik saqqummiussinermi ilaatigut paasisititisinaanerit siunnersortissallu oqaatigineqarput, Demokraatilli tigussaalluinnartumik siunnersuuteqassamaarput, Jens B. Frederiksen oqarpoq.

- Upernaamut saqqummiutilerparput inatsisissatut siunnersuut, tassa Kalaallit Nunaannut biilit sarfatortut imaluunniit brintitortut eqqussorneqarnermi akileraarut peerneqassasoq, taamaalilluta innuttaasunut kajumissaarutigisinnaassavarput mingutsitsinngitsunik biilinik pisisalersinnaanissaat nunatsinni. Kalaallit Nunaatali suliffeqarfittut aningaasarsiorfittullu ineriartornissaa qulakkeerneqartariaqartoq, Jens B. Frederiksen isumaqarpoq.

- Isumaqatigiissutip iluani anguneqartariaqarpoq annertunerusumik CO2-mik aniatitsisinnaanissarput. Eqqarsaatigisariaqarpoq ineriartortitsissagutta inuussutissarsiornermut tunngasut, soorlu Alcoa aamma piiaavinnik nutaanik pilersitsissagutta, taava CO2-mik nunatsinni aniasitsineq annertusarneqassaaq allatut ajornarluni. Taamaammat angusariaqarparput isumaqatigiissutip iluani annertunerusumik CO2-mik aniatitsinissamik pisinnaassalluta. Demokraatilli siulittaasuata Naalakkersuisut siunnersuutaata ilalertariaqarnera ilaatigut imak tunngavilersorpaa.

- Naalakkersuisut saqqummiunnikuusaat taakku tapersersornarput, aammma taakkua aallukkutsigit taava nunarsuarmioqatitta ammaffiginerussavaat allamik kissaateqarutta. Iliuusissanut tusarniaanissaq marsip naggataanut ingerlassaaq.