Demokraatit ajugaarujussuarnerat qinersisartunit tupaallaatigineqartoq
Marlunngornermi Inatsisartunut qinersisoqarpoq, qinersinerillu inerneri amerlasuunit tupaallaatigineqarput. KNR Nuup qeqqani upernaarpalaaqisumi qinersinerup inernerisa qanoq igineqarnerannik apersuiartorpoq.
Johan Reimer
Qinersinerup inernera qanoq igaajuk?
-Allatuulli tupaallaatigaara. Pissutsit qanoq innerat qineqqusaarnerup nalaani erseriartuaarpoq ingammik inuit attaveqaqatigiiffiisigut. Inuit sumut nikerianngujoornersut malunnarnikuuvoq, qangatut pisoqarunnaarluni. Inuit allannguinissamut piumassuseqarlutik qinersiartorsimanerat malunnarpoq, Johan Reimer oqarpoq.
Suut tupaallaatigaagit?
-Siumut qanoq kinguariartiginissaa tupaallaatigisinnaasattut eqqarsaatinniinnikuuvoq. Pissutigalugu partiinut allanut noorartut amerlasoorujussuarnit qinerneqarnikuugamik, taassumalu aamma saniatigut Inatsisartuni nutaartaat illuatungaanut nuunnikut, nutaamik tamarmik qinigaanerat aamma tupaallannalaarpoq.
Qanormi neriuuteqarpit?
-Neriuppunga eqqissillutik ullut tulliuttut suleqatigiinnissaq patajaatsoq eqqartorumaaraat, tassami ukiuni sisamani suleqatigiittussaagamik. Assortuuterujussuarnerit akerartuunnerillu annertuut Facebookikkunni ingerlanneqarsimasut tutsinniartussaavaat, inuiaqatigiit avissaartuutinnginnissaat aamma anguniarneqartussaasoq ilimagaara, Reimer oqarpoq.
Taassuma ilanngullugu oqaatigaa qinersinerup inernerisa takutikkaat innuttaasut allannguerusuttut.
-Pissanganassapput politikkikkut anguniakkanik ersarissunik tunngaveqarnersut, ilimagaara tamakku qallorneqalissasut, soorlu aalisarnermut inatsit, takornariaqarnermut inatsit. Tamakku ilaatigut assortuussutaallutik aaqqinniarsarineqarnissaat ilimanarpoq, Johan Reimer naggasiivoq.
Kirstine Abelsen
Qinersinerup inernera qanoq igaajuk?
-Ajorinngilara, qinigara soraluara Lars Poulsen (Siumut aaqq.) isernikuugami. Ippassaq innarnikuugatta naammassineqanngitsut pissangasorujussuulluta, ullaaq makikkatta oqarfigineqarama Larsigooq isertoq, nuannaarlunga nilliavunga, Kirstine Abelsen oqarpoq.
Suut tupaallaatigaagit?
-Qinersisoqaraangat malinnaarpiarneq ajorama, kisianni soraluannguara pillugu qinersisarpunga, oqarpoq.
Qanoq neriuuteqarpit?
-Neriuutigaara ajunngitsumik ingerlassasut, Kirstine Abelsen naggasiivoq.
Katja Bjørn
Qinersinerup inernera qanoq igaajuk?
-Ajorinngilara, nuannaarpunga Demokraatit siuttuullutik isermata, neriutiginikuullugu allanngortoqarnissaa, qangaaniilli taakku ileqqut, isertartullu taakkuujuartarmata allanngortoqarnissaa neriuutigerujussuarnikuugakku, Katja Bjørn oqarpoq.
Arlaannik tupaallaateqarpit?
-Aap, takorluunngikkaluarakku Demokraatit taamarsuaq qinerneqassasut. Ilimagiusakkaluarakku suli ukiorpassuarni IA-kkut Siumukkullu siuttuujumaartut. Tupaallappunga taamak amerlatigimmata, oqarpoq.
Nutaat isertut qanoq neriuuteqarfigivigit?
-Neriuppunga allanngortoqassasoq, aqutseriaaserlu allanngussasoq kiisalu inuiaqatigiit eqeersimaarnerulernissaat neriuutigaara, Katja Bjørn naggasiivoq.
