Demokraatini siulittaasunngorniuuttoqarpoq

Kommuneqarfik Sermersuumi borgmesterip sinniisussaa Justus Hansen iliuutsinik allannguinissaq piffissanngorsoraa.

- Siulittaasunngoruma naatsorsuutigisinnaavarsi misigisartuunera isiginneriaaseralu nutaaq. Demokraatini siornatigut siulittaasuunikuunngilanga, nutaamik eqqarsarsinnaalluarneralu atorluarsinnaallugu, Justus Hansen taama oqarpoq.

Aamma atuaruk Nivi Olsen: Demokraatini siulittaasunngorusuppunga

Justus Hansen Randi Vestergaard Evaldsenilu sassarput, Nivi Olsenip sassarnissani eqqarsaatigaa sapaatip akunnerata tullianilu aatsaat aalajangiutissalugu ilumut sassarniarnerluni. Justus Hansenip siulittaasunngoruni angusaqarluarnissaq sukataarutigissavaa.

- Politikkimi ersarinnerulissaagut. Soorunami Kommuneqarfik Sermersuumi, Naalakkersuisuni Inatsisartunilu ersarikkaluarpugut. Isumaqarpunga angusaqarluarnissaq anguniassagipput, Justus Hansen taama oqarpoq.

Aamma atuaruk Anda Uldum politikkimit tunuarpoq

Angutinili sassarniartuni kisimiinngilaq. Poul Hansenip Inatsisartuni Randi Vestergaard Evaldsenimut sinniisuusoq sassarniarnerluni suli eqqarsaatigaa, siulersuisulli naapitsinnagit aalajangernianngilaq.  

- Taanna suli aalajanginngilara massakkut Danmarkimiikkallarama, Poul Hansen oqarpoq. Isertuutinngilaali piukkunneqarluni saaffigineqartarnini.

- Piukkunneqarpunga suu, taanna isertuussanngilara piukkunneqarniga, Poul Hansen oqarpoq.

Demokraatiineersut Michael Rosing aamma Tillie Martinussen KNR-imut oqaatigaat sassarniarnatik.