Demokraatini siulittaasunngorniutilerput

Ataatsimeersuarneq ualeru nalunaaqutaq arfinermut ammarneqassaaq, ilaatigullu oqaluuserineqassallutik Inatsisartuni ilaasortat marluk, tassa Astrid Fleischer Rex-ip aamma Jens B. Frederiksenip, kiisalu Nuummi kommunalbestyrelsimi ilaasortap, Karen M. Lyngep, partiimit anisitaanerat. Tamatuma saniatigut siulittaasumik, siulersuisuunernik sinniisussaannillu qinersisoqassaaq. Malittarisassanut allannguutissatut siunnersuutit oqaluuserisassanut aamma ilaapput.

Siulittaasunngorniuttut tassaassapput Jens B. Frederiksen aamma Per Berthelsen, Per Berthelsenili ataatsimeersuaqataaniarani nalunaareerpoq.

Immikkoortortaqarfiit tamarmik, Sermitsiap nittartagaa naapertorlugu, qinerseqataaniarput. Immikkoortortaqarfiit ilaat aningaasakilliorneq pissutigalugu ilaatitaqarsinnaanngillat, ataatsimeersuaqataasussalli ilaannut piginnaatitsissummik nassiussaqareerput.

Immikkoortortaqarfiit tamarmik, aamma siulersuisuunerni ilaasortat tamarmik, qinersisinnaatitaapput.