Demokraatini siulittaasunngorlaaq: Akileraarnikinnerulerneq innuttaasullu peqqinnerusut
- Siulittaasutut sassarpunga misigisimagama tunniussassanik ulikkaarlunga. Partiip iluani sulinikuuvunga ukiuni arfinilinni. Uumateqarfigalugu partiitinni ideologeerput inuit kiffaanngissusaat ukkataralugu sulisaratta. Tassalu imminut ajukkutinngiivillunga sassarpunga isumaqarama tunniussassanik ulikkaarlunga, Demokraatit siulittaasortaavat, Jens Frederik Nielsen oqarpoq.
Demokraatit inatsisartut gangianni ataatsimiittarfimmi ataasinngormat unnukkut arfineq marlunut ataatsimeersuarnerat aallartimmat, siulittaasussatut suli qinigassanngortittoqanngilaq.
Oqaluuserisassanili siulittaasussamik qinersinissaq tikinneqarmat Demokraatit immikkoortortaqarfiani Sermersuup kitaani siulittaasuata Anna Wangenheimip Jens Frederik Nielsen innersuummagu akerlerineqanngilaq.
Taamaalilluni 28-nik ukiulik Jens Frederik Nielsen Demokraatini siulittaasunngorpoq.
Akileraarutit peqqinnerlu samminiarai
Taassuma qulequttat pingasut pingaarnertut siulittaasutut sulissutiginiarlugit KNR-imut oqaatigaa.
Demokraatit ukiuni kingullerni marlunni sulissutigisimasaat siulittaasortaap nangeqqikkumavai. Ilaatigut suliffeqarnermut ilanngaat. Isertitakitsut akunnattumillu isertitallit akissaqarnerulernissaat taamaalilluni angujumavaa.
- Siullermik eqqaasinnavara sulinermut ilanngaat eqqunnikuuarput. Piviusorsiorpugut, aningaasat tigoriaanaanngimmata annikittumik inisseqqavoq taanna. Kisianni taasuma allisarnissaanut periarfissat ujartorniarpagut. Tassa sutigut tamatigut innuttaasut kaasarfiani aningaasat annerpaat tuttariaqarput, siulittaasoq oqarpoq.
Jens Frederik Nielsenip oqarnera naapertorlugu sulinermut ilanngaateqalernikkut innuttaasut sulerusunnerulissaapput. Ilanngaatinik iluanaaruteqarnerpaajusussat ukiumut 4.100 koruuninik atugassaqarnerulissapput.
Ilanngaalli kaasatsitsinni aatsaat aappaagu malugisinnaanngussavarput. Siunnersuut siorna akuersissutigineqarpoq, aningaasaqarnermut inatsimmi aappaagumiit tassunga 47 millionit koruunit ukiumut atorneqartalissapput.
Siorna piginneqatigiiffinnut akileraarut 30 procentimiit 25 procentimut appartinneqarpoq. Siulittaasunngorlaap suli appartinneqaqqinnissaa anguniarniarpaa.
- Appaqqinnissaa suli siunniutissavarput. Kisianni maannakkut oqarsinnaanngilagut qanoq qasserpiamik appassanersoq. Soorunami nunatta aningaasaqarnera tassani assorujuk apeqqutaavoq. Corona nualluussuaq maannakkut aamma nunatsinnut eqquivoq. Taannalu immaqa isumaqartussaavoq, inuussutissarsiorneq suli malunnartumik tapiissuteqarfigineqartariaqarallassasoq.
Nunatsinni innuttaasut peqqinnerulernissaat siulittaasunngorlaap aamma sulissutigerusuppaa. Taanna nammineerluni sulorartartutut ilisimaneqarpoq, timersornerlu aqqutigalugu inuit peqqinnerulissasut taanna isumaqarpoq.
- Timersornikkut piorsaanissarput aamma ukkataraarput, inuit peqqissut peqqissumik inooriaasillit imminut akisussaasut pilersikkusuppagut. Peqqissumik inooriaaseqarnikkut peqqinnissaqarfik atornikinnerulertarpaat inuit ilaa.
Demokraatit inuup qileruteqannginnissaanik pisinnaatitaaffearneranillu sivitsuersumi siuarsaarusuttuuvoq, siulittaasyullu siunniussaq attatiinnarusuppaa..
- Tassa 2018-imi qinersinermi partiip anguniagaanut nutaat saqqummerput. Tungujornerungaarput, oqaluttuarisaaneq qiviassagutsigu suli tungujornermut aallarsarpoq tassani. Taanna uanga ukkataralugu isumaqatigalugu ingerlatsitsissuunga. Partiittut liberaliuvugut kisianni ikiortariaqavissortut meeqqat atuarfiat, paaqqinnittarfiit allallu suli aallunniarpagut. Taamaammat social-liberalitut imminut taasarnikuuvugut.
