Puiguttorneq nunarsuarmi toqqutigineqartuni nalinginnaanerpaat qulit akornanniittoq
Puiguttorneq nunarsuarmi toqqutigineqartuni nalinginnaanerpaat qulit allattorsimaffiannut siullerpaamik ilanngunneqarpoq.
Naalagaaffiit Peqatigiit peqqissuunissaq pillugu suleqatigiiffiat, WHO, pingasunngormi taama ilisimatitsivoq.
Puiguttorneq nalunaarsukkat 2019-imeersut naapertorlugit nunarsuarmi toqqutigineqartuni nalinginnaanerpaat allattorsimaffianni normu 7-iuvoq.
Puiguttorneq Europami USA-milu toqqutigineqartuni nalinginnaanerpaat pingajoraat.
Puiguttornermik nappaateqarlutik toqusartuni arnat amerlanerpaapput.
Puiguttorneq nappaatinut assigiinngitsunut sianissutsikkut sanngiillisitsinermik kinguneqartitsisartunut taaguutaavoq.
Uummallunneq, inuuserlunneq pualluullu KOL nunarsuarmi siorna toqqutigineqartuni nalinginnaanerpaasut, WHO-p nalunaarusiaani allaqqavoq.
AAMMA ATUARUK Abelsen: Sukkortunut sullissivik peqqinnarnerusumik inooriaaseqalernissamut aqqutissiueqataassaqaaq
Sukkorneq, puiguttorneq assigalugu, nunarsuarmi toqqutigineqartuni nalinginnaanerpaat qulit allattorsimaffiannut siullerpaamik ilanngunneqarpoq.
Sukkornermut attuumassutilimmik nunarsuaq tamakkerlugu 2000-p 2019-illu akornanni toqquteqartut 70 procentinik amerleriarsimapput.
Covid-19 nunarsuarmi 2020-mi toqqutigineqartuni nalinginnaanerpaat qulit allattorsimaffiannut ilanngukkiartortoq, WHO-p oqaaseqartartua ilisimatitsivoq.
Nunarsuarmi inuit 1,5 millioninit ikinnerunngitsut coronavirusimik toqquteqartutut nalunaarsorneqarsimapput.
Inuillu agguaqatigiisillugu ukiunik arfinilinnik 2000-mili inuunertunerulersimasut, WHO-p nalunaarusiaani aamma erserpoq. Nunarsuaq tamakkerlugu 2019-imi inuit agguaqatigiissillugu 73-inik ukioqarlutik toqusarput.