Delhimi unammersuarnissat unitsiinnalerunarpaat

Unammiuaarnerit tulliani sapaatiuppat aallartittussaapput.

Aaqqissuussap piareersarnera paatsiveqanngilaq, inigineqartussat sussaanngillat, unammiffiusussami nappaatit tuniluuttut imaaginnavipput isiginnaartullu inissaat qanittukkut nakkaappoq.

Timersortartut arlaqartut tamakkua pillugit uniinnarsimapput amerlaqisullu Delhi-mukarnissartik kinguartippaat.

Timersortartut Commonwealth-imut ilaasuneersut 8.000-it unammiuaarnerni peqataanissaat naatsorsuutigineqarpoq. Timersortartut nunarsuarmi pitsaanerpaat sisamat maanna peqataaniarnatik nalunaareerput allallu nunanit arlalinneersut nunanut allanut sungiusariartinneqarput tassanilu qanoq pisoqarnissaa utaqqimaarpaat.

Australiamiup unammiuaarnermi siulittaasuusup Indiamiut sinnerlugit ajuusaarpoq pisussallu maanna taamaannera siallerneranik peqquteqarnerarlugu, Aviisi Hindustan Times ullumi allappoq.

Siallernerata nalaaniikkaluartorluunniit tassa ilumut ajornartorsiuteqarput tamannalu Indiamiut nuannarinngeqaat. Unammiuaarnissat piareersarnerlungaanerujussua Indiamiut amerlaqisut kangusuutigigaat Hindustan Times-ip isumasiunerata takutippaa. Indiami naalakkersuinermi illuatungiliuttut Indiami naalakkersuisut isoraat Indiap tusaamaneqarnera sullarlunnermikkut ajortisarnerarlugu.

Nunat Commonwealth-imi ilaasut naalakkersuisuisa pisoq aamma oqaluuserilereersimavaat. Australiami naalakkersuisut siulittaasuat oqarpoq timersortartut ataasiakkaat peqataassanerlutik namminneq aalajangerumaaraat.

- Pinerliiniartoqarataannaaneranut allaat isumakuluutiginerarpaa, Australiap premierministeria oqarpoq.

Unammiuaarnerit pilersaarutit malillugit tulliani sapaatiuppat aallartittussaapput. Taama DR ilanngutassiivoq.