DBU-mik suleqateqarneq GBU-p naammagaa
DBU ulluni kingullerni kalaallit nunarsuarmi arsaattartut allat peqatigalugit nunatut periarfissinneqartannginnerat pillugu uparuartorneqarpoq. DBU-li kalaallit arsaattartut ineriartortinneqarnissaannut peqataasoq, Lars Lundblad erseqqissaavoq.
- Tulluusimaarutigeqaarput DBU-mik suleqatiginninnissarput suli pitsaanerulersinniarlugu qanittukkut atsioqatigiinnerput. Suleqatigiinnissamik atsioqatigiinneq 2006-imi atsiorneqartoq taamaalilluni ukioq 2009-p naanerata tungaanut ingerlaannartussanngorpoq, oqarpoq, nangillunilu:
-Isumaqatigiissuterput ilaatigut kalaallit isikkamik arsartartut sungiusaasuisa, dommerissat aamma dommerissanik pikkorissaasartussat ilinniartittarnissaannik imaqarpoq – pikkorissaanerit tamakku Europami arsaattartut Kattuffissuata akuerisarai.
Lars Lundbladip aamma oqaatigaa GBU-p nunarsuarmi arsaattartut kattuffissuanut FIFA-mut ilaasortanngornissaanut suliniartoqartoq. FIFA-mut ilaasortaaneq UEFA-mut ilaasortanngornermik aamma kinguneqartarpoq.
FIFA-p piumasaraa Kalaallit Nunaata nammineq nunatut ilanngunnissaanut Naalagaaffiit Peqatigiinnut ilaasortanngorsimanissaa.
GBU-llu tamanna FIFA-p killilersuineratut isigaa, isikkamik arsartarnerup nunarsuarmi ineriartortinnissaa pingaartikkuniuk killilersuissanngikkaluarmat.
- Nunarsuarmi arsaattartut kattuffissuata FIFA-p pissusilersornerata takutiinnarpaa arsaq nammineq pigisutut isigigamikku, Nunatsinni arsartartut Kattuffianni siulittaasoq Lars Lundblad naggasiivoq.