Davisstrædemi qaleralinniarnerusoqarsinnaasoq ilisimatuut siunnersuutigaat

Qeqertarsuup Tunuani kiisalu Tunumi qaleralinniarnerup annikillineqarnissaanut ilisimatuut siunnersuuteqarput, Davisstrædemili qalerallit pisarineqarsinnaasut 30 procentip tungaanut qaffanneqarput, tassa 2010-mi avataasiorlutik qaleralinniat 14.000 tonsinik pisaqarsinnaasut Ilisimatuut siunnersuuteqaramik.

- Davisstrædemi qalerallit amerliartorput, tamannalu aalisarneqarpallaannginnerinik aallaveqarpoq, akerlerluinnaanillu Tunumi qalerallit aalisarneqarpallaarput, tassani qaleralinniarsinnaaneq pillugu ilisimatuut siunnersuutaat sinnerlugit ukiuni arlaqartuni qaleralinniartoqartarpoq, tamatuma kingunerisaanik qalerallit ikiliartuinnarput taamaammat qalerallit pisarineqarsinnaasut 5.000 tonsiussasut ilisimatuunit siunnersuutigineqarpoq, ullumikkut pisarineqarsinnaasut katillutik 22.000 tonsiusut. Pinngortitaleriffimmi immikkoortortami pisortaq Helle Siegstad oqarpoq. Tunumi qalerallit pisarineqarsinnaasut appartinniarnissaat ajornakusuussasoq Helle Siegstad aamma oqarpoq, tassami qaleraleqatigiit tunumiittut Islandimiunit Kalaallit Nunaanniillu aalisarneqartarmata, nunallu taakku marluk pisassiinissamut immikkut siunnersuisoqarlutik.

Tunumiinnaanngitsoq aamma Qeqertarsuup Tunuani qaleralinniarsinnaanermut tunngatillugu ilisimatuut mianersoqqusipput. Tassa Qeqertarsuup Tunuani qalerallit pisarineqarsinnaasut 8.800 tonsinut appartinniarneqarput.