Dash ataaseq uninngammat kinguaattoorneqarpoq
Timmisartumi pujorsunnileraluartumi issimasulli sukkulluunniit ulorianartorsiunngitsut, Air Greenlandimi tuniniaanermut pisortaa, Christian Keldsen erseqqissaavoq.
- Uani pisumi ulorianartoqanngilaq. Timmisartup aqunneranut akornusiinngilaq, aamma isumannaassuseq ulorianartorsiunngilaq, Christian Keldsen oqarpoq.
Air Greenlandili tassa Dash 8-mik ataatsimik ullumikkut amigaateqarpoq, taamaalilluni kinguaattoortussanngorluni.
Nuummiit Kangerlussuarmut tassanngaanniillu Danmarkimut ingerlaqqittussat GL 1544-mik ingerlaartussaagaluit, timmisartunut allanut nuunneqassapput, Danmarkimullu aatsaat aqagu apuutissallutik, Air Greenlandimit ilisimatitsipput.
Islandimut ullumikkut timmisartornissat aamma ingerlanneqassanngillat. Tassunga atatillugu Air Greenland timmisartumik attartorpoq, aqagulu timmisartuussisinnaanissaq neriuutigineqarpoq. Ilaasussat ilisimatinneqarumaarput.
- Ullumikkumut pilersaarusioreersimavugut, ullumikkumut aqagumullu immikkut pilrsaarusiorersimalluta, sapaatip-akunnerani kingullermi ajornartorsiutivut tassa iluarsiivigisimasinnaagaluarpavut, kisianni tassa qaqqap innermik anitsisup qullaatsitai qaangereerpavut, Christian Keldsen oqarpoq. Timmisartup Dash 8-p ajoquteqarneranit ilaasussat 80-it 90-illu akornanniittut eqqugaapput. Timmisartuutileqatigiiffiulli suli naatsorsuutigaa ilaasussat 900-t missaanniittut kinguaattooqqasut tamaasa apuuffissaannut sapaatip-akunnerata naanerani apuukkumaarlugit.
Qaqqap innermik anitsisup qullaattitaasa sinnerinik Uummannap Upernaviullu eqqaani suli peqarpoq, timmisartuutileqatigiiffilli Qeqertarsuup Tunuata avannaanut Dash 7 aamma Dash 8 atorlugit timmisartornissaminut akuerisaareerpoq, Airbus aamma angalasinnaatitaalluni.
Københavnimiit angalasussat, Air Greenlandimit suli attavigineqarsimanngitsut, timmisartunut allanut aqagu ilaariataarsinnaanertik aamma ilimagisinnaavaat.
Air Greenlandip ilisimatitsissutigaa Kangerlussuarmi sivisuumik utaqqisoqarsinnaassammat, ilaasut ilaasa Kangerlussuarmi unnuinissartik aamma naatsorsuutigisinnaavaat. Air Greenlandip nittartagaatigut imaluunniit tekst TV-kkut malinnaasoqarsinnaavoq.
