Dash 8-t tamaasa SAS-ip atorunnaarpai
SAS-ip timmisartuutaata Dash 8-p arfininngormat ajutoornera 250 millioni koruunit aamma 325 millioni koruunit akornanni SAS-imut 2007-ip sinnerani akeqassaaq. SAS tusagassiutinut ullaaq maanna taama nalunaaruteqarpoq.
oktobarip 29-at 2007 07:06
Canadami timmisartuliorfissuup Bombardierip timmisartuutai Dash 8-t septembarimi marloriarlutik ajutoornerisa kingorna timmisartut taamaattut sapaatip akunnerini pingasuni nunamiitittariaqarsimammata SAS 400 millioni koruunit sinnilaarlugit taarsiivigineqarnissaminik piumaqarpoq.
SAS ippassaq aalajangerpoq timmisartuutini Dash 8-t tamaasa atorunnaarniarlugit, timmisartullu taakku taartigisinnaasaannik SAS maanna nassaarnialerpoq.
2008-p ingerlanerani suna tamarmi aaqqinneqassasoq SAS-ip naatsorsuutigigaa, nutaarsiassaqartitsivimmi Ritzauimi allaaserinnittoqarpoq.
SAS-ip piginneqatiginnissutai 8 procentimik ullaaq manna nalikilleriartut, Danmarkip Radionit ilisimatitsissutigineqarpoq.
