Dash 8-t ilaat angalaqqilerput

Canadamiut timmisartuliorfiannit Bombardier-imit nalunaarutigineqarpoq, timmisartut Dash-8-t tunineqarsimasut 70 procentii ilaasunik angallasseqqilersut. Ullaarmanna dr.dk-mi taama allaaserinnittoqarpoq.

Naak timmisartut Dash-8-t Aalborgimi Letlandimilu Vilniusimi ajutooraluartut, timmisartuliorfiup timmisartut amerlanerusut angallasseqqilernissaat naatsorsuutigaa.

- Ulluni tulliuttuni timmisartut amerlanerusut angallasseqqilernissaat naatsorsuutigaarput, timmisartuliorfiup pisortaa Steven Ridolfi.

Nunanili Avannarlerni timmisartut Dash-8-t angallasseqqilissanngikkallarput. Danmarkimi naalagaaffiup mittarfeqarfinnik nakkutilliisoqarfia ippassaq nalunaarpoq Nunani Avannarlerni mittarfeqarfinnik nakkutilliisut timmisartut taakkua angallasseqqusaajunnaarnerat ingerlatiinnarniarallaraat.

SAS-ip timmisartui Københavnip Kangerlussuullu akornanni ingerlaartartut unitsinneqareerput. SAS nittartakkamini nalunaarpoq Nunatsinnut timmisartuussisarnertik upernaaru aatsaat aallarteqqinniarlugu.