Dash 8-t ajutoortut misissuiffigineqarput

Skandinaviami silaannakkut angallannermut qullersaqarfiit aalajangerpaat, Dash-8-nik angalaqqusiunnaaraluarneq taamaatikkiartuaarneqassasoq.

SAS-ip timmisartuutaa Dash-8, ullut aqqanillit matuma siorna Ålborgimi minnerliorpoq, ullullu pingasuinnaat qaangiummata assinga, timmisartoq Dash-8, Vilnius-imi minnerliorpoq, assakaasuinut talerperlernut atasut aserormata. Taamanikkulli Dash-8-t tamarmik angalaqqusaajunnaarput. Maannakkulli silaannakkut angallannermut qullersaqarfimmiit tusagassiisartoq, Thorbjørn Ancher oqarpoq, angalaqqusaaleqqinnissaannut aalajangersimasunik piumasaqaateqarlutik. Timmisartut Dash-8-t ataasiakkaarlugit misissorneqassapput, minnissaminnullu atortuisa ilaannaat taarserneqaannassanngillat aaqqissorneqaannarlutilluunniit, pingitsooratik minnermut atortut tamarmik nutaanik taarserneqareerpata, misilittarneqareerlutillu aatsaat angalaqqusaaleqqissinnaalissapput. SAS-imiit tusagassiisartoq, Jens Langergård oqarpoq, SAS-imi nammineq maanna piumasaqaatigineqartut assigisaannik piumaasaqaateqarnissartik ataasingormalli aalajangiussimallugu, isumannaatsumimmi angallassinissaq salliutinneqartussaammat. Taamaammat piffissaq suli sivisujaaq taarsersuereerutta aatsaat Dash-8-t angallassinermi atorneqaleqqissapput. Qaqugorpiarli Dash-8-t angalaqqilersinnaanersut suli oqaatigisinnaanngilarput, Jens Langergård oqarpoq.

Ålborgimi Letlandimilu Vilniusimi minnerliornerni Dash-8-t sorpiaat ajoqutigisimaneraat, timmisartunik ajutoortoqarsimatillugu misissuisartut marluusut maanna misissorpaat.