Dash 8 Danmarkimi minnermini ajutooqqippoq
Københavnimi politiit oqaatigaat timmisartup assakaasua talerperleq timmisartup minnerani ajutoortoq, timmisartorlu talerpimmut uerterujussuarlugu. Ajutoornermi ilaasunik annerusumik ajoqusertoqanngilaq.
Timmisartoq Norgimi Bergenimit Københavniliartuuvoq 42-nik ilaasulik – taakkunannga meeqqat marluullutik – timmisartumik ingerlatsisut marluk aamma saqisut marluk inuttaralugit, SAS aviisip Politikenip nittartagaanut taama ilisimatitsivoq.
Timmisartoq nalunaaqutaq ualimut nalunaaqutaq 14.25 mittussaagaluarluni ajornartorsiulerluni nalunaaruteqarpoq.
Timmisartup miffissaani ambulancit arlallit piareersimatinneqarput aamma qatserisartut timmisartup miffissaa qapuusamik qallersorsimavaat.
Ajornartorsiulerluni minneq pivoq timmisartut taakkua Aalborgimi aamma Letlandimi Vilniusimi assingusumik ajutooreersullu, tamannalu pissutigalugu oqartussat ajutoornerit misissuiffigineqarneranni Dash 8-t timmeqqujunnaarallarpaat.
