Dash-7 assakaasumigut akornutilik

Air Greenlandip timmisartuutaasa ilaat Dash-seven Kangerlussuarmi isumannaallisaaneq pissutigalugu ippassaq nunnittariaqarsimavoq.
Allattoq Elisa Isaksen
novembarip 23-at 2008 17:36

Tamatumunga pissutaavoq qangattareernerup kingornagut timmisartup assakaasua siorleq qullarsinnaasimanngimmat.

GL 103 Qaarsuniit qangattarsimatsiaannartoq timmisartup naalagaata paasivaa, assakaasoq siorleq qangattarsinnaanngitsoq. Assakaasoq pissusissamisut inissisimalluni anillaqqavoq, timmisartullu naalagaa pilersaarutit naapertorlugit Ilulissanut ingerlaannarniarluni aalajangerpoq.

Timmisartulli milernermi qullii ikinneqarmata paasivaa, qulliit ikumanerat siumorluinnaq samminngitsoq, tamannalu assakaasup siumut samminnginneranut peqqutaasinnaasoq. Taamaattumik timmisartup naalagaa aalajangerpoq Ilulissanut minnani Kangerlussuarmut ingerlaannarniarluni, tassanimi mittarfik takinerullunilu silinnerummat, sakkortunngitsumillu minnissaq ajornannginnerussammat.

Air Greenlandimit nalunaarutigineqarpoq ilaasut tamarmik ajunngitsut Ilulissanullu ingerlaqqinnissaminnut piareersimasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq