Dash 7 ajoquserneqartoq
Tamatuma kinguneranik ippassaq Kulusummukarnissaralua taamaatiinnarneqarpoq, aamma ullumikkut Kulusummukarnissaralua iluatsinngitsoorpoq, tamatumuuna Kulusummi silarlunnera pissutigalugu utiinnartariaqarsimagami.
Air Greenlandip Nuummiit Kulusummukartitsinissani maanna arfininngorpamut imaluunniit sapaatiuppamut pilersaarutigileraa, timmisartortitseqatigiiffiup nalunaarutigaa.
Tamatuma peqatigisaanik timmisartoq ippassaq ajoquserneqartoq ullumikkumut piareerneqarsinnaanngilaq, ajoqusernera naatsorsuutigisamit annerummat. Aatsaallu arfininngorpat ullaakkut piareersinnaanissaa naatsorsuutigineqalerluni.
Tamanna aqagu timmisartuussinissanut sunniuteqassaaq. Ilaasut ilaat Nuummiit aallartussat siusinnerusukkut aallartariaqassapput, soorluttaaq Nuummiit Sisimiut aqqusaarlugit Ilulissanut sinersortussaq nalunaaquttap akunnerinik arlalinnik kinguartinneqartariaqassasoq.
Ilaasut kalluarneqartussat Air Greenlandimit attaveqarfigineqaleruttorput, aqagulu angalasussat nalunartut pillugit Air Greenlandip nittartagaanik alaatsinaaqqullugit kajumissaarneqarput.
