Darfurimi qimaasut nunaminnut utersinnaanngorput
Sudanimi nunap ilaani, Darfurimi, naalagaaffiup inuinit imminnut sorsuuffioqisumi, eqqugaasut 850 millionit dollarsinik pissarsinissartik naatsorsuutigisinnaanngorpaat.
Nunat Islamisiortut Kattuffiat, OIC, aaqqissuisoralugu, nunarsuaq tamakkerlugu aningaasaliisussarsiorluni ataatsimeersuartoqarmat, 850 millionit dollarsit, tassa qallunaat aningaasanngorlugit 4,7 milliardit koruunit, pissarsiarineqarput.Danmarkip Radioata nittartagaani tamanna atuarneqarsinnaavoq.
Darfurimi Sudanimiittumi innuttaasut imminnut sorsuummata qimaasut qimaatitaasulluunniit 3 millionit aningaasat taakku iluaqutigalugit eqqissillutik tassa maanna utersinnaanngorput.
Brasilia, Qatar, Tyrkialu nunani aningaasaliinerpaapput, aningaasaleeqataalluartunullu ilaavoq Islamimik upperisallit ineriartornermut aningaasaateqarfiat.
Afrikap kangisissuani nunap ilaani Sudanimiittumi, Darfurimi, sorsuuttoqarmat inuit 300.000-it toqutaasimassangatinneqarput, Darfurimilu inunnik ikiuniarneq 2003-mili ajornartorsiutaalerpoq.
