Darfurimi inuppassuit sakkutuunit inussiaatigineqarput

Arnat, angutit meeqqallu qimarrattut tigusareriarlugit unnuakkut Sudanimi illoqarfiit pingaarnersaannut, Kartoumimut timmisartuunneqartarput, tamaanilu sakkutuut kiffassaattut agguaanneqartarlutik. Sudanimi politikerit ilaat kinaassutsiminik isertuussisoq taamatut Darfurimi ikiuiniaqatigiiffimmut, Darfur Konsortiumimut oqaluttuarpoq.

Sudanimi inussiaateqartoqarnera Præsident Bashirip assortoraluaraa, inuppassuit takunnissimallutik oqaluttuaat assigiit inussiaateqartoqarneranik uppernarsaapput. Meeqqat angerlarsimaffinni kiffanngortarput, arnat kiffaanngikkaangamik narsaatini sulisinneqartarput, arneriffigineqartarlutillu. Angutit narsaatini naalliutsitaallutik sulisinneqartarput. Darfur Konsortiumip Naalagaafiit peqatigiit Afrikamilu nunat suleqatigiiffiat pissutsit ajorluinnartut unitsinnissaannut malunnaatilimmik sunniiniaqquaat, Darfurimilu naalakkersuisut inussiaatissanik malersuisartut inussiaatillillu eqqartuussivikkut malersoqquaat pillarneqaqqullugillu.