Danskit umiartortut sallunaveeqqutitut tiguaaqqajunnaarput

Umiartortut taakku juunip ulluisa aallaqqaataannili sallunaveeqqutitut tigummineqalerput, umiarsuaq danskinit pigineqartoq sanaartugassanut atortussanik usilluni Dubaiimiit Mombassap tungaanut ingerlaartilluni Somaliap sineriaani tigusarineqarmalli. Aviisimi Politikenimi taama aallaaserisaqarput.

Tigusarineqartut tigusaaqqanermik nalaani assut ilungersunartorsiorsimapput, nunanulli allanut ministereqarfik ilisimatitsivoq tamarmik ajunngitsut. Danica White isumannaatsumik maanna umiarsualivissarsiniunneqarpoq, ikiortigaa franskit umiarsuaaraataat sorsuuteeraq, Blaison.

Sakkutuut Imarsiortut Qullersaqarfianiit aallartitat aggustip ulluisa 14-iannili Blaisonimut ilaallutik angalaarput. Nunanut allanut ministereqarfiup ilisimatitsissutiginngilaa danskit umiartortut tallimat taakku Danmarkimut qaqugu anngutissanersut.

Imaani piiaasunit danskinik sallunaveeqqutitut tigusineq ullutsinni takornartaavoq. Danmarkimi nunanut allanut ministereqarfik aatsaavissuaq taama nalaataqarpoq, Somaliamilu naalakkersuisunik suleqatiserinnikkaluarluni, taakkuli qanoq iliuuseqarsinnaannginnerarput.

Somaliami uiernersuaq tamatumunnga pissutaavoq, oqartussaasut suliarisinnaasaat killilerujussuullutik