Danskit umiarsuaassui CO2-mik aniatitsinikilliniarput

Suliffeqarfilli aniatitsinerup millinissaa pillugu suliniuteqarpoq. Tamanna allaffissornermi pisortap Niels Smedegaard Andersenip uppernarsarpaa ullumi Københavnimi isumasioqatigiinnermi, tassanilu nunarsuatsinni inuussutissarsiutinik ingerlatsisut pisortaat peqataapput. Taassuma ilaatigut tikkuarpaa siorna A.P Møller Mærskip CO2-mik aniatitsinini 9 procentimik annikillilisissimagaa.

Siorna CO2-mik aniatitsinerput 9 procentimik annikillisipparput, tamannalu annertuvoq, taamatulli ingerlaannarsinnaanngilagut, ikummatissamilli sipaarutta taava aningaasaativut sipaassavagut. Tamassumunnga suliniuteqarpugut, soorlu arriitsumik motori aallartittarlugu, tomgangernaveersaarluta, motorinilu teknologi nutaaq atulernikuuarput pujoorfimmiit kissaq atoqqissinnaallutigu.

Ippassaq Vestas-ip pisortaa Ditlev Engell-ip CO2 pillugu akileraaruteqalissasoq siunnersuutigaa. Isuma taanna Niels Smedegaard Andersenip isumaqatigaa, akileraarutinit aningaasat isertut teknologiimut nutaamut ilisimatusarnermut atorneqassappata.

- Isuma taanna pitsaasuuvoq, akileraarutilli isertut CO2-mik aniatitsinnginnerusunik atortunik ilisimatusarnernut atorneqassapput, kissaatituarpullu tassaavoq CO2-mut akileraarutit nunarsuarmi tamarmi assartuisartunut tamanut assigiimmik sunniutilimmik atuutsinneqalissasut, taamaassanngippammi siulliusussat naapertuutinngitsumik eqqorneqassapput. Naalakkersuisut aniatitamik annikillisaaniarnerminni nunatsinni umiarsuit angallannerannit CO2-mik aniatitsinerat 2012 angutinnagu 5 procentimik annikillisinnissaat anguniarpaat. Kim Brejnholt taama ilanngutassiivoq.