Danskit tartuminnik tunniussiumasorpassuit
Holland-imi tartulersitsittusanik unammisitsineq tallimanngormat TV-ikkut aallakaatinneqarneqarnerata kingorna , danskit tartuliinissaminnut kajumillutik nalunaartut imaaginnavissimapput. TV-ikkut aallakaatitsinerup kingorna qallunaat 1476-it tartuminnik tunniussimajullutik nalunaarsimapput. Tassalu sapaatip akunnerata siulianut naleqqiullugu tartuliiumallutik nalunaarsimasunit 1300-nik amerlanerullutik, tassalu 172–it tartuminnik tunniussimallutik timip atortuinik tunisisartut allattorsimaffiannut allatsissimagamik. Tartuminnik tunniussinissaminnut allatsittut arfininngormat amerlanerpaasimapput, TV-ikkut aallakaatitaq nunarsuarmi tusagassiorfinni allaaserineqarluni sammineqarmat. Tartuliuumallutik allatsittut arfininngornermi 694-iusimapput, arfininngornermi siuliani nalunaarsimasunit tallimariaammik amerlanerullutik.
Danmark-imi tartuluttut peqatigiiffianni Dansk Nyreforening-imi siulittaasup , Stig Hedegård-ip pisut qiimmassimaarutigai. Ajunngitsorujussuuvoq, ullut ilaanni iluatsitsiffiusuni ullormut 75-it tartuminnik tunniussimallutik allatsittarput, Stig Hedegård ritzau-imut oqaluttuarpoq.
Tamassuma takutiinnarpaa oqallinerup kingorna inuiaqatigiinnut sunniutai. Danmark-imi danskit 495.732-it toqugunik timimi pisataannik tunniussimallutik allatsissimammata. Pisariaqartinneqartullu amerlanerujussuupput, Charlotte Sick Nielsen napparsimavissuarmi Rigshospital-imi timip pisataanik nuussisarfimmi ataqatigissaarisoq ritzau-imut oqarpoq.
