Danskit svenskillu timmisartui russillu timmisartuat Østersøp silaannartaani naapittut
Danskit svenskillu peqatigiillutik itigartitsinissamik siunertaqarlutik upalungaarsimasartui russit sakkutuuisa timmisartuanik Østersøp silaannaani ippassaq sisamanngornermi naapitsisimasut, illersornissaqarfiup nittartagaani allaaserineqarpoq.
- Russit timmisartui alapernaarsuutit akuttunngitsumik Østersø qulaavaallugu timmisarput, taamatullu ilillutik timmisarnerat Danmarkip nunallu sanilerisaannut sillimmartaartitsilertarput, tassami taakku timmisartuutaat malersuutit tingisariaqalersarmata, illersornissaqarfik allappoq.
Immikkullu ittumik suleqatigiilluni iliuuseqaqatigiinneq taanna siumut aaqqissugaareerpoq, aammali aatsaat siullerpaamik danskit svenskillu taamatut suleqatigiillutik periarput.
- Suleqatigiinnerup eqaalluinnartumik ingerlanera takullugu iluarisimaarnarluinnarpoq, oberstløjnant aammalu timmisartunut tunngatillugu pisortaasoq Hans Skovmose taama unnersiorpalaartumik oqarsimanerarneqarpoq.
Timmisartut sorsuutit sisamat taakku Østersøp nalaani tassa Sverigep Sjællandip Bornholmillu qulaavaanni ippassaq sisamanngornermi nalunaaqutaq ataatsimut naapipput.
