Danskit suliffeqarfii saffiugassanik qaqutigoortunik soqutiginnipput
Suliffeqarfissuaq Grundfos, ilaatigut pumpenik tunisassiortuusoq, suliffeqarfiit saffiugassanik qaqutigoortunik pinngitsuuisinnaanngitsut ilagaat.
- Saffiugassat tamakku pissarsiarisinnaanissaat pingaartuuvoq. Nunarsuarmi tamakkuninnga tunisassiornerup 97-98 procentia Kinap tigummimmagu ajornartorsiornartuuvoq, taamaattumik tamatumunnga suliniutit tamarmik tikilluaqqunarput, taamaalillutimmi pissarsiarisinnaanissaat ajornannginnerussammat, Grundfos-imi pisortaq Carsten Berg Aarhus Stiftstidendemut oqarpoq.
Aamma ingerlatseqatigiiffik Dansk Industri EU-p isumaqatigiissuteqarnissaanik aamma neriuuteqarpoq. Matumani saffiugassanut qaqutigoortunut atatillugu kisermaassipajaarluni ingerlatsineq EU-p unitsissinnaassagaa neriuutigineqarluni, tassani tamakkuninnga tunisassiornerup 97 procentia Kina-mit tigummineqarmat.
Suliffeqarfiit allat saffiugassanik qaqutigoortunik atuisut tassaapput anorisaatiliorfiit Siemens aamma Vestas, oqarasuaatinik angallattakkanik tunisassiorfiit aamma biilinik innaallagissamoortunik tunisassiortut.
