Danskit silaannarmut politikkiat amigartoq

Silaannarmik mingutsitsinerup annikillisinneqarnissaa pillugu Kyotomi isumaqatigiissut eqquutsikkumallugu Danmarkimi naalakkersuisut pilersaarusiorsimanngillat, tamannalu silaannaq pillugu nunanik tamalaanik 2009-mi danskit ataatsimeersuartitsiuunissaat eqqarsaatigalugu iluanngilluinnarpoq, Danmarkimi partii SF naalakkersuisunut taama uparuaavoq.

- Avatangiisinut ministerip Connie Hedegaardip silaannarmik mingutsitsinerup annikillisinneqarnissaa qaqqaqqalaarutigiuarpaa, oqalunnerali timitaqanngilaq. Taamaattumik silaannarmut ersarissumik pilersaaruteqannginnitta EU-mit naammagineerunnera tupinnanngilaq, SF-it avatangiisit pillugit oqaaseqartartuat Steen Gade nutaarsiassaqartitsivimmut Ritzaumut oqarpoq.

Danskit naalakkersuisuisa Kyotomi isumaqatigiissutip eqquutsinneqarnissaanut pilersaaruteqarnerat naammannginnerarlugu paasinannginnerarlugulu EU kommissioni 37-nik apeqquteqarpoq.

Soorlu anori iluaqutigalugu innaallagissiuutit 2009-mi aatsaat atulersussat, 2008-mi silaannarmik mingutsitsinermut annikillisaaqataanerarlugit oqalunneq eqqunngitsuusoq, EU kommissioni tikkuaavoq.

- Naalakkersuisut imaqanngitsumik ingerlatsinertik nalunngittariaqaraluarpaat, soorluli ima eqqarsarsimasut, ajunngikkuni ajussanngilaq, Steen Gade oqarpoq.